ഹരിപ്പാട്:മുത്തച്ഛനൊപ്പം സ്കൂളിലേക്ക് സ്കൂട്ടറിൽ പോയ വിദ്യാർത്ഥിനി ടിപ്പർ ലോറി കയറി മരിച്ചു.നങ്ങിയാർകുളങ്ങര ബഥനി സ്കൂളിലെ നാലാം ക്ലാസ് വിദ്യാർത്ഥിനി മുട്ടം ഉഷസ് വില്ലയിലെ എയ്മി(9)യാണ് മരിച്ചത്.നങ്യാർകുളങ്ങര-മാവേലിക്കര പാലമൂട് ജംഗ്ഷന് സമീപം ചൊവ്വാഴ്ച രാവിലെ 8.15 നായിരുന്നു അപകടം.മുത്തച്ഛൻ റിട്ട.എസ്.ഐ രാഘവനൊപ്പം പിന്നിലിരുന്നു സഞ്ചരിക്കുമ്പോൾ സ്കൂട്ടറിന് പിന്നിൽ ടിപ്പർ ലോറി ഇടിക്കുകയും ഇടിയുടെ ആഘാതത്തിൽ റോഡിലേക്ക് തെറിച്ചു വീണ കുട്ടിയുടെ തലയിലൂടെ ടിപ്പർ കയറുകയുമായിരുന്നു.സ്കൂളിന് അമ്പതു മീറ്റർ മാത്രം അകലെയാണ് അപകടം നടന്നത്.ട്രെയിൻ പോയ ശേഷം ലെവൽക്രോസ്സ് തുറന്നപ്പോൾ നിർത്തിയിട്ടിരുന്ന വാഹനങ്ങൾ ഒന്നിച്ചു മുന്പോട്ടെടുത്തപ്പോൾ ടിപ്പർ സ്കൂട്ടറിൽ ഇടിക്കുകയായിരുന്നു.അപകടത്തെ തുടർന്ന് ഓടി രക്ഷപ്പെട്ട ഡ്രൈവറെ പിന്നീട് പോലീസ് കസ്റ്റഡിയിലെടുത്തു.അപകടത്തിൽ പെട്ടത് തന്റെ മകളാണെന്നറിയാതെ കുട്ടിയുടെ അമ്മ പുറകിലുള്ള സ്വകാര്യ ബസിൽ യാത്ര ചെയ്യുന്നുണ്ടായിരുന്നു.മൂവരും ഒന്നിച്ചാണ് വീട്ടിൽ നിന്നിറങ്ങിയതെങ്കിലും ചാറ്റൽ മഴയെ തുടർന്ന് കുട്ടിയുടെ അമ്മ സ്കൂട്ടറിൽ നിന്നും ഇറങ്ങി ബസിൽ കയറുകയായിരുന്നു.