കാസർകോഡ്:സ്വകാര്യ ബസ്സിൽ നിന്നും തെറിച്ചു വീണ് വിദ്യാർത്ഥിനി മരിച്ചു.ബദിയടുക്ക കോ ഓപ്പറേറ്റീവ് ആർട്സ് ആൻഡ് സയൻസ് കോളേജിലെ ഒന്നാം വർഷ എം.എ ഹിസ്റ്ററി വിദ്യാർത്ഥിനി ഉഷാലതയാണ്(21) മരിച്ചത്.ചെടിക്കാനത്തെ പരേതനായ ചുക്രപ്പയുടെയും മീനാക്ഷിയുടെയും മകളാണ്.നിറയെ യാത്രക്കാരുമായി പോവുകയായിരുന്ന ബസിൽ നിന്നും മുൻവാതിൽ തുറന്ന് റോഡിലേക്ക് തലയടിച്ചു വീഴുകയായിരുന്നു.പരിക്കേറ്റ ഉഷയെ തൊട്ടുപിന്നാലെ വന്ന കാറിൽ ബദിയടുക്കയിലെ സ്വകാര്യ ആശുപത്രിയിലും പിന്നീട് കാസർകോട്ടെ ആശുപത്രിയിലും പ്രവേശിപ്പിച്ചെങ്കിലും ജീവൻ രക്ഷിക്കാനായില്ല.നെക്രാജെക്കും പൊയ്യക്കണ്ടത്തിനും ഇടയിലുള്ള വളവിലെത്തിയപ്പോൾ ബസിന്റെ വാതിൽ തുറന്നു പോവുകയായിരുന്നു.അശ്രദ്ധമായി ഓടിച്ചു ജീവഹാനിയുണ്ടാക്കിയതിനു ഡ്രൈവറെ പോലീസ് അറസ്റ്റ് ചെയ്തു.ബസും കസ്റ്റഡിയിലെടുത്തു. ഉച്ചയ്ക്ക് ശേഷമാണ് ഉഷയ്ക്ക് ക്ലാസ്.ഉച്ചവരെ ബദിയടുക്കയിലെ ഒരു മെഡിക്കൽ ഷോപ്പിൽ ജോലിചെയ്തു കിട്ടുന്ന വരുമാനം കൊണ്ടാണ് ഉഷ പഠിച്ചിരുന്നത്.മാർച്ചിൽ ബാറഡുക്കയിലെ ഒരു യുവാവുമായി വിവാഹം നടത്താൻ നിശ്ചയിച്ചിരിക്കുകയായിരുന്നു.മൃതദേഹം ജനറൽ ആശുപത്രിയിൽ പരിശോധനയ്ക്ക് ശേഷം വീട്ടു വളപ്പിൽ സംസ്‌ക്കരിച്ചു.