പരിയാരം: പരിയാരം മെഡിക്കല്‍ കോളജ് കാമ്പസില്‍ മെഡിക്കൽ വിദ്യാർഥിനിക്കു തെരുവ് നായയുടെ കടിയേറ്റു. രണ്ടാം വര്‍ഷ ബിഡിഎസ് വിദ്യാർഥിനി പി.കെ.ഫസാനയ്ക്കാണ് (21) കടിയേറ്റത്. ഇന്നലെ രാവിലെ ഒന്‍പതരയോടെ കോളജിനു പുറകിലെ ഹോസ്റ്റലില്‍ നിന്നും ദന്തല്‍ കോളജിലേക്ക് നടന്നുവരുമ്പോഴാണ് നായ ആക്രമിച്ചത്.വിദ്യാര്‍ഥിനിയുടെ കരച്ചില്‍ കേട്ട് ഓടിയെത്തിയവരാണ് പെണ്‍കുട്ടിയെ രക്ഷിച്ചത്. കാലിന് മാരകമായ മുറിവേറ്റ ഫസാനയെ മെഡിക്കല്‍ കോളജില്‍ പ്രവേശിപ്പിച്ചു. കാമ്പസില്‍ മാലിന്യം അലക്ഷ്യമായി വലിച്ചെറിയുന്നത് തെരുവു നായശല്യം വർധിക്കാനിടയാക്കുന്നുണ്ട്.