തിരുവനന്തപുരം: എസ്‌എസ്‌എല്‍സി,പ്ലസ് ടു പരീക്ഷകള്‍ക്കുള്ള മാര്‍ഗ്ഗ രേഖ പുറപ്പെടുവിച്ച്‌ സംസ്ഥാന സര്‍ക്കാര്‍. പരീക്ഷകള്‍ നടത്തുന്നത് സംബന്ധിച്ച്‌ കഴിഞ്ഞ ദിവസം അന്തിമ തീരുമാനം എടുത്തിരുന്നു. ഇതിന് പിന്നാലെയാണ് പരീക്ഷകള്‍ക്കുള്ള മാര്‍ഗ്ഗ നിര്‍ദ്ദേശങ്ങള്‍ സര്‍ക്കാര്‍ പുറപ്പെടുവിച്ചത്.പരീക്ഷകള്‍ക്കെത്തുന്ന വിദ്യാര്‍ത്ഥികളെയെല്ലാം തെര്‍മല്‍ സ്‌ക്രീനിംഗിന് വിധേയമാക്കും. അതിന് ശേഷമാകും പരീക്ഷ ഹാളിലേക്ക് പ്രവേശിപ്പിക്കുക. വിദ്യാര്‍ത്ഥികളെ സ്‌ക്രീനിംഗിന് വിധേയമാക്കേണ്ട ചുമതല ആശാ വര്‍ക്കര്‍മാരേയാണ് ഏല്‍പ്പിച്ചിരിക്കുന്നത്. പരീക്ഷകള്‍ക്ക് മുന്‍പ് ക്ലാസ്സ് മുറികളും പരിസരവും ഫയര്‍ഫോഴ്സ് അണുവിമുക്തം ആക്കണം.നിയന്ത്രണ മേഖലകളില്‍ നിന്നും പരീക്ഷ എഴുതാന്‍ എത്തുന്നവര്‍ക്ക് പ്രത്യേകം സൗകര്യം ഒരുക്കും. പരീക്ഷ എഴുതാന്‍ കഴിയാത്ത വിദ്യാര്‍ത്ഥികള്‍ക്ക് വീണ്ടും പരീക്ഷ എഴുതാന്‍ അവസരം നല്‍കുമെന്നും സര്‍ക്കാര്‍ പുറത്തിറക്കിയ നിര്‍ദ്ദേശത്തില്‍ പറയുന്നു. നിലവില്‍ മാര്‍ച്ച്‌ 26 മുതല്‍ 30 വരെയാണ് എസ്‌എസ്‌എല്‍സി പ്ലസ് ടു പരീക്ഷകള്‍ നടക്കുക.