ന്യൂഡല്‍ഹി: ശബരിമലയ്ക്ക് മാത്രമായി പ്രത്യേക നിയമം വേണമെന്ന് സുപ്രീം കോടതി. മറ്റ് ക്ഷേത്രങ്ങളുമായി ശബരിമലയെ ബന്ധപ്പെടുത്തരുതെന്നും കോടതി വാക്കാല്‍ പരാമര്‍ശിച്ചു. പന്തളം രാജകുടുംബാംഗം സമര്‍പ്പിച്ച ഹര്‍ജിയില്‍ വാദം കേള്‍ക്കവേയാണ് ജസ്റ്റിസ് രമണയുടെ പരാമര്‍ശം. തിരുവിതാംകൂര്‍ ദേവസ്വം ബോര്‍ഡിന് കീഴിലുള്ള എല്ലാ ക്ഷേത്രങ്ങളുടെയും ഭരണ നിര്‍വഹണത്തിനായി പ്രത്യേക ബോര്‍ഡ് രൂപീകരിക്കാന്‍ സര്‍ക്കാര്‍ തീരുമാനിച്ചിരുന്നു. ഇതിനെതിരെയാണ് പന്തളം രാജകുടുംബം കോടതിയെ സമീപിച്ചത്.വനിതകള്‍ക്ക് ദേവസ്വം ബോര്‍ഡില്‍ മൂന്നിലൊന്ന് സംവരണം ഏര്‍പ്പെടുത്തിയിട്ടുണ്ടെന്ന് അറിയിച്ച സര്‍ക്കാരിനോട്, ഏഴംഗബെഞ്ച്, ശബരിമലയില്‍ യുവതികള്‍ പ്രവേശിക്കണ്ട എന്ന് ഉത്തരവിടുകയാണെങ്കില്‍ ഇത് എങ്ങനെ പ്രായോഗികമാവുകയെന്നും ചോദിച്ചു.
ശബരിമലയ്ക്ക് പ്രത്യേക നിയമം നിര്‍മ്മിക്കുമെന്ന് രണ്ട് മാസം മുമ്ബ് സംസ്ഥാന സര്‍ക്കാര്‍ സുപ്രീം കോടതിയെ അറിയിച്ചിരുന്നു. അതനുസരിച്ച്‌ ഇന്ന് കേസ് സുപ്രീം കോടതി പരിഗണിച്ചപ്പോള്‍ നിയമത്തിന്റെ ഒരുകരട് സര്‍ക്കാര്‍ കോടതിയ്‌ക്ക് കൈമാറുകയാണ് ചെയ്‌തത്.ഇതില്‍ ഭരണ സമിതിയുടെ മൂന്നിലൊന്ന് സ്ഥാനം വനിതകള്‍ക്ക് സംവരണം ചെയ്തിട്ടുണ്ട്. ഇത് ചൂണ്ടിക്കാട്ടിയാണ് കോടതി വിമര്‍ശനമുന്നയിച്ചത്.ശബരിമലയെ മറ്റ് ക്ഷേത്രങ്ങളുമായി ബന്ധപ്പെടുത്തരുതെന്നാണ്സര്‍ക്കാര്‍ അഭിഭാഷകനോട് ജസ്റ്റിസ് രമണ പറഞ്ഞത്. പ്രതിവര്‍ഷം ഏതാണ്ട്50 ലക്ഷം ആളുകള്‍ ദര്‍ശനം നടത്തുന്ന ക്ഷേത്രമാണ് ശബരിമലയിലേതെന്നും അദ്ദേഹം ചൂണ്ടിക്കാട്ടി.സംസ്ഥാന സര്‍ക്കാര്‍ കോടതിക്ക് കൈമാറിയ നിയമത്തിന്റെ കരടില്‍ വനിതകള്‍ക്ക് ദേവസ്വം ബോര്‍ഡിന്റെ ഭരണ സമിതിയില്‍ മൂന്നിലൊന്ന് സംവരണം ചെയ്തിട്ടുണ്ട്. ശബരിമല വിഷയത്തില്‍ ഏഴംഗ ബെഞ്ച് യുവതികളെ പ്രവേശിപ്പിക്കരുതെന്ന നിലപാടിലെത്തുകയാണെങ്കില്‍ ഭരണസമിതിയിലെ വനിതകള്‍ക്ക് എങ്ങനെ ശബരിമലയിലെത്താന്‍ കഴിയുമെന്ന് ജസ്റ്റിസ് രമണ ചോദിച്ചു.അതേസമയം സര്‍ക്കാര്‍ കൈമാറിയ പുതിയ നിയമത്തിനെ സംബന്ധിച്ച്‌ കൂടുതല്‍ വിശദാംശങ്ങള്‍ അറിയാനുണ്ടെന്നും അതിനാല്‍ സംസ്ഥാന സര്‍ക്കാരിന്റെ മുതിര്‍ന്ന അഭിഭാഷകന്‍ ജയ്ദീപ് ഗുപ്തയോട് ഹാജരാകണമെന്നും ജസ്റ്റിസ് രമണ നിര്‍ദ്ദേശിച്ചു. ജയ്ദീപ് ഗുപ്ത ഹാജരാകുന്നതിനുവേണ്ടി കേസ് ഇന്ന് വീണ്ടും പരിഗണിക്കും. 100 വര്‍ഷം കാത്തിരുന്നാലും സര്‍ക്കാര്‍ ശബരിമലയ്ക്കായി നിയമം കൊണ്ടുവരില്ലെന്നാണ് കേസ് ഇന്ന് ആദ്യം പരിഗണിച്ചപ്പോള്‍ തന്നെ ജസ്റ്റിസ് രമണ അഭിപ്രായപ്പെട്ടത്.