തിരുവനന്തപുരം:തിരുവനന്തപുരത്തിന്റെ വിവിധ ഭാഗങ്ങളിൽ ഇന്നലെ നേരിയ തോതിൽ ഭൂചലനം അനുഭവപ്പെട്ടു. ഇടുക്കിയിലുള്ള ഭൂകമ്ബമാപിനിയില്‍ 2 തീവ്രത രേഖപ്പെടുത്തിയ ഭൂകമ്പം വെഞ്ഞാറമൂട്, കല്ലറ ഭാഗങ്ങളിലാണ് ഏറെയും അനുഭവപ്പെട്ടത്.വെഞ്ഞാറമൂടിനും കല്ലറയ്ക്കുമിടയില്‍ ചൊവ്വാഴ്‌ച സന്ധ്യയ്ക്ക് 7.45ഓടെയായിരുന്നു നേരിയ ഭൂചലനം അനുഭവപ്പെട്ടത്. പരിഭ്രാന്തരായ നാട്ടുകാര്‍ വീടുവിട്ട് പലദിക്കിലും പാഞ്ഞു. ചിലര്‍ പുറത്തിറങ്ങിനിന്നു. പരിഭ്രാന്തരായി പൊലീസ് സ്റ്റേഷനുകളിലും ഫയര്‍ഫോഴ്സിലും വിളിച്ചു. ആദ്യം വന്‍ ശബ്ദവും പിന്നീട് നേരിയ വിറയലുമാണ് അനുഭവപ്പെട്ടതെന്ന് പലരും പറഞ്ഞു. ദുരന്തനിവാരണവിഭാഗവും ഫയര്‍ഫോഴ്സും കൂടുതല്‍ നിരീക്ഷണങ്ങള്‍ നടത്തിവരുന്നു. വെഞ്ഞാറമൂട്, കല്ലറ, ഭൂതമടക്കി, കരിച്ച, പുല്ലമ്ബാറ, ശാസ്താംനട, പരപ്പില്‍, ചെറുവാളം, പാലുവള്ളി,മുതുവിള, തെങ്ങുംകോട്, വാഴത്തോപ്പ് പച്ച ,തണ്ണിയം,മിതൃമ്മല ഭാഗങ്ങളിലാണ് ഭൂചലനം അനുഭവപ്പെട്ടത്. കട്ടിലില്‍ നിന്ന് മറിഞ്ഞുവീണതായി ഭൂതമടക്കി സ്വദേശി ബേബിയും കസേരയില്‍ നിന്ന് മറിഞ്ഞുവീണതായി കരിച്ച സ്വദേശി ബൈജുവും അടുക്കളയില്‍ റാക്കില്‍ വച്ചിരുന്ന പാത്രങ്ങള്‍ ശബ്ദത്തോടെ മറിഞ്ഞുവീണതായി കരിച്ച സ്വദേശി തുണ്ട് വിളാകത്തില്‍ പ്രഭാകരനും ഫയര്‍ഫോഴ്സില്‍ വിളിച്ചറിയിച്ചു. അഞ്ച് മിനിട്ട് ഇടവിട്ട് രണ്ട് തവണകളിലായി ഭൂമി വിറച്ചതായി തോന്നിയെന്നാണ് നാട്ടുകാര്‍ പറയുന്നത്.