തിരുവനന്തപുരം:ലോക്ഡൗണ്‍ അവസാനിച്ചതിനെ തുടര്‍ന്ന് സര്‍വീസ് നടത്താൻ സർക്കാർ അനുമതി നൽകിയെങ്കിലും ആശങ്കകളുമായി സ്വകാര്യ ബസുടമകള്‍.ഒറ്റ-ഇരട്ട നമ്പർ ക്രമത്തില്‍ സർവീസ് നടത്തുന്നത് അപ്രായോഗികമാണെന്ന് ബസ് ഉടമകള്‍ അറിയിച്ചു. സ്വകാര്യ ബസുകള്‍ നിരത്തിലിറക്കാന്‍ സർക്കാർ പ്രത്യേക പാക്കേജ് നടപ്പാക്കണമെന്നും ഡീസലിന് സബ്‌സിഡി നല്‍കിയില്ലെങ്കില്‍ ബസ് ചാര്‍ജ് കൂട്ടണമെന്നുമാണ് ബസുടമകളുടെ ആവശ്യം.അണ്‍ലോക് പ്രക്രിയയുടെ ഭാഗമായി ഒറ്റ- ഇരട്ട ക്രമത്തിലുളള സ്വകാര്യ ബസ് സെര്‍വീസ് എന്ന ആശയം ആദ്യരണ്ടുദിവസം പിന്നിടുമ്പോൾ തന്നെ തിരിച്ചടിയെന്നാണ് ബസുടമകളടെ വിലയിരുത്തല്‍. ബസ് ജീവനക്കാര്‍ ഉപജീവനം തേടി മറ്റ് തൊഴിലുകള്‍ തേടിപ്പോയതും പ്രയാസം സൃഷ്ടിക്കുന്നു. നഷ്ടം സഹിച്ച്‌ നിയന്ത്രണങ്ങളോടെ സർവീസ് നടത്തുന്നതിലും ഭേദം നിര്‍ത്തിയിടുന്നതാണ് എന്നാണ് ഒരുവിഭാഗം ബസ് ഉടമകള്‍ പറയുന്നത്. സ്വകര്യ ബസ് വ്യവസായം നേരിടുന്ന പ്രതിസന്ധി മുഖ്യമന്ത്രി , ധനമന്ത്രി, ഗതാഗത മന്ത്രി എന്നിവരെ കണ്ട് ധരിപ്പിക്കും. വെള്ളിയാഴ്ച ആദ്യദിനം സര്‍വീസ് നടത്തിയതിനെക്കാള്‍ കുറഞ്ഞ ബസുകള്‍ മാത്രമാണ് നിരത്തിലിറങ്ങിയതെന്നും പ്രതിസന്ധി വരുംനാളുകളില്‍ രൂക്ഷമാവുമെന്നും ഉടമകള്‍ പറയുന്നു.