തിരുവനന്തപുരം:കല്ലട ബസ്സിൽ യുവതിയെ പീഡിപ്പിക്കാൻ ശ്രമിച്ച സംഭവത്തിൽ ഡ്രൈവറുടെ ലൈസൻസ് റദ്ദാക്കുമെന്ന് ഗതാഗതമന്ത്രി.മണിപ്പാലിൽ നിന്ന് തിരുവനന്തപുരത്തേക്ക് പോവുകയായിരുന്ന കല്ലട ട്രാവൽസിന്റെ ബസ്സിലാണ് തമിഴ്നാട് സ്വദേശിനിയായ യുവതിക്ക് നേരെ പീഡന ശ്രമം നടന്നത്.കണ്ണൂർ നിന്ന് കൊല്ലത്തേക്ക് പോകുകയായിരുന്ന യാത്രക്കാരി കോഴിക്കോട് കാക്കഞ്ചേരിയിൽ വെച്ച് ബഹളം വെച്ചതോടെ സഹയാത്രക്കാർ ഇടപെട്ട് വാഹനം നിർത്തിച്ചു. ബസിന്റെ സഹഡ്രൈവർ ജോൺസൺ പുതുപ്പള്ളി തന്നെ കയറിപ്പിടിക്കാൻ ശ്രമിച്ചെന്ന് യുവതി ആവർത്തിച്ചതോടെ യാത്രക്കാർ പൊലീസിനെ വിവരം അറിയിച്ചു.ഇതോടെ തേഞ്ഞിപ്പാലം പൊലീസ് സ്ഥലത്തെത്തി ബസ് കസ്റ്റഡിയിലെടുത്തു.യുവതിയുടെ പരാതിയിൽ ജോൺസനെ കസ്റ്റഡിയിലെടുത്ത പൊലീസ് ഇയാളുടെ അറസ്റ്റ് രേഖപ്പെടുത്തി.