കല്യാശ്ശേരി:മികച്ച ഉച്ചഭക്ഷണം നൽകുന്ന സ്കൂളുകൾക്ക് അവാർഡ് നല്കാൻ തീരുമാനം.സ്കൂൾ ഉച്ചഭക്ഷണ പദ്ധതി കാര്യക്ഷമമായി നടപ്പിലാക്കുന്നതിന്റെ ഭാഗമായാണ് തീരുമാനം.സ്കൂൾ ഉച്ച ഭക്ഷണ പദ്ധതിയുടെ സംസ്ഥാനതല മോണിറ്ററിംഗ് കമ്മിറ്റിയാണ് ഇത് സംബന്ധിച്ചുള്ള തീരുമാനമെടുത്തത്.ഇത് സർക്കാരിന്റെ അംഗീകാരത്തിന് വിധേയമായി നടപ്പിലാക്കും. സ്കൂളുകളിൽ ഗുണനിലവാരമുള്ള പച്ചക്കറികൾ വിതരണം ചെയ്യുന്നതിനായി കുടുംബശ്രീകളെ ചുമതലപ്പെടുത്തണമെന്നാണ് മറ്റൊരു ശുപാർശ.ഇതിനായി ഒരുകുട്ടിക്ക് രണ്ടുരൂപ നിരക്കിൽ നൽകും.പാചകക്കാരുടെ പ്രായപരിധി 60 വയസാക്കും,ഇരുനൂറ്റി അൻപതിൽ കൂടുതൽ വിദ്യാർഥികളുള്ള സ്കൂളുകളിൽ രണ്ടു പാചകക്കാരെ നിയമിക്കുക,കണ്ടിജൻസി ചാർജുകൾ 100 കുട്ടികൾക്ക് വരെ ഒൻപതു രൂപയായി വർധിപ്പിക്കുക,അരി സിവിൽ സപ്ലൈസിൽ നിന്നും നേരിട്ട് സ്കൂളുകളിൽ എത്തിക്കുക,നവംബർ മുതൽ സ്കൂളുകളിൽ പാചകത്തിനായി പാചകവാതകം ഉപയോഗിക്കുക,പാചകത്തിനായി സ്കൂളുകളിൽ ഉപയോഗിക്കുന്ന വെള്ളം പരിശോധിക്കാൻ സാങ്കേതിക ഏജൻസികളെ ഏർപ്പെടുത്തുക തുടങ്ങിയവയും കമ്മിറ്റിയെടുത്ത പ്രധാന തീരുമാനങ്ങളാണ്.മികച്ച ഉച്ചഭക്ഷണം നൽകുന്ന മൂന്നു സ്കൂളുകൾക്ക് സംസ്ഥാനതലത്തിൽ 3 ലക്ഷം,2 ലക്ഷം,1 ലക്ഷം എന്നിങ്ങനെയും ജില്ലാ തലത്തിൽ 30,000,20,000,10,000 എന്നിങ്ങനെയും സമ്മാനം നൽകും.