തിരുവനന്തപുരം:സംസ്ഥാനത്തെ സ്വകാര്യ ബസുകൾക്ക് ഒരേ നിറമാക്കി ഏകീകരിക്കുന്നതിനുള്ള നടപടിക്രമങ്ങൾ ഇന്ന് മുതൽ തുടങ്ങും.അടുത്ത വർഷം ഫെബ്രുവരി ഒന്നിനുള്ളിൽ ഇത് പൂർണ്ണമാകും.സംസ്ഥാന ഗതാഗത അതോറിട്ടിയുടേതാണ് തീരുമാനം.ഇന്ന് മുതൽ രജിസ്റ്റർ ചെയ്യുന്ന ബസുകൾക്കും ഫിറ്റ്നസ് പരിശോധനയ്‌ക്കെത്തുന്ന ബസുകൾക്കും പുതിയ നിറം നിർബന്ധമാക്കി.പുതിയ തീരുമാനം അനുസരിച്ച് സിറ്റി ബസ്സുകൾക്ക് ഇളം പച്ചയും,ഓർഡിനറി ബസ്സുകൾക്ക് ഇളം നീലയും,ലിമിറ്റഡ് സ്റ്റോപ്പ് ഓർഡിനറി ബസ്സുകൾക്ക് ഇളം മെറൂണുമാണ് നിറം നിശ്ചയിച്ചിരിക്കുന്നത്.എല്ലാ ബസുകൾക്കും അടിവശത്ത് ഓഫ് വൈറ്റ് നിറത്തിൽ മൂന്നു വരകളും ഉണ്ടാകും.മത്സരയോട്ടം തടയാൻ നിലവിലെ സമയക്രമം പുനഃ ക്രമീകരിക്കാനും ട്രാൻസ്‌പോർട് അതോറിറ്റി യോഗം തീരുമാനിച്ചു.