കോഴിക്കോട്:അവശ്യസാധനങ്ങളുടെ വിലവര്‍ധനവില്‍ പ്രതിഷേധിച്ച്‌ കേരളത്തിലെ ഹോട്ടല്‍, റസ്റ്റോറന്റ് ഉടമകള്‍ സമരത്തിനൊരുങ്ങുന്നു. സാധനങ്ങളുടെ വില നിയന്ത്രിക്കാന്‍ സര്‍ക്കാര്‍ ഉടന്‍ ഇടപെടണമെന്നും അല്ലാത്തപക്ഷം ഹോട്ടല്‍ അടച്ചിട്ട് സമരം ചെയ്യുമെന്നും വ്യാപാരികള്‍ അറിയിച്ചു.ഡിസംബര്‍ 17ന് നടക്കാനിരിക്കുന്ന കേരള ഹോട്ടല്‍ ആന്റ് റസ്റ്റോറന്റ് അസോസിയേഷന്റെ യോഗത്തിലാണ് സമരവുമായി ബന്ധപ്പെട്ട അന്തിമ തീരുമാനം പ്രഖ്യാപിക്കുമെന്നും ഭാരവാഹികള്‍ അറിയിച്ചു.സവാളക്ക് പിന്നാലെ പച്ചക്കറികള്‍ക്ക് വില കുതിച്ചുയര്‍ന്ന സാഹചര്യത്തില്‍ ഹോട്ടല്‍ വ്യാപാരം വലിയ പ്രതിസന്ധിയിലാണ്. പച്ചക്കറിവില മാറിമറിയുമെങ്കില്‍ പോലും ബിരിയാണി അരി ഉള്‍പ്പെടെ വിവിധ ഇനം അരികള്‍ക്കും അവശ്യ സാധനങ്ങള്‍ക്കും വില വര്‍ധിച്ചതോടെ കച്ചവടം നടത്താന്‍ സാധിക്കാത്ത അവസ്ഥയാണെന്ന് ഹോട്ടല്‍ ഉടമകള്‍ പറയുന്നു. ഈ സാഹചര്യത്തില്‍ വിലനിയന്ത്രിക്കാന്‍ സര്‍ക്കാര്‍ അടിയന്തിരമായി ഇടപെടണമെന്ന് ഹോട്ടല്‍ ആന്റ് റെസ്‌റ്റോറെന്റ് അസോസിയേഷന്‍ ആവശ്യപ്പെട്ടു.