തിരുവനന്തപുരം:ആക്രമിക്കപ്പെട്ട നടിയടക്കം നാല് നടിമാർ ‘അമ്മ സംഘടനയിൽ നിന്നും രാജിവെച്ച പശ്ചാത്തലത്തിൽ ‘അമ്മ’യ്‌ക്കെതിരെ രൂക്ഷ വിമർശനവുമായി വനിതാ കമ്മീഷനും. ‘അമ്മ’ നിലപാട് വ്യക്തമാക്കണമെന്ന് സംസ്ഥാന വനിതാ കമീഷന്‍ ചെയര്‍പേഴ്സണ്‍ എം.സി ജോസഫൈന്‍ മാധ്യമങ്ങളോട് പറഞ്ഞു. ക്രിമിനല്‍ കേസില്‍ പ്രതി സ്ഥാനത്ത് നില്‍കുന്ന നടന്‍ ദിലീപിനെ തിരിച്ചെടുത്തത് ശരിയായില്ല. ലഫ്റ്റനന്‍റ് കേണല്‍ പദവിയിലിരിക്കുന്ന മോഹന്‍ ലാലിന്‍റെ നിലപാട് ഉചിതമല്ല. അമ്മ അവധാനതയോടെ വിഷയം കൈകാര്യം ചെയ്യണമായിരുന്നുവെന്നും ജോസഫൈന്‍ ചൂണ്ടിക്കാട്ടി.ദിലീപിനെ തിരിച്ചെടുത്തതില്‍ പ്രതിഷേധിച്ച്‌ അക്രമത്തെ അതീജീവിച്ച നടി ഉള്‍പ്പെടെ നാല് നടിമാര്‍ അമ്മയില്‍ നിന്ന് കഴിഞ്ഞ ദിവസം രാജിവച്ചിരുന്നു. നടിമാരുടെ നിലപാടിന് പിന്തുണ പ്രഖ്യാപിച്ച്‌ നിരവധി മന്ത്രിമാരും രാഷ്ട്രീയ നേതാക്കളും രംഗത്തെത്തിയിട്ടുണ്ട്.അതിനിടെ സംഭവം വിവാദമായ പശ്ചാത്തലത്തില്‍ അമ്മയുടെ അടിയന്തര എക്‌സിക്യൂട്ടീവ് യോഗം ശനിയാഴ്ച വിളിച്ചുചേര്‍ത്തിട്ടുണ്ട്. ദിലീപിനെ തിരിച്ചെടുക്കാനുള്ള തീരുമാനത്തില്‍ കൂടുതല്‍ചര്‍ച്ച അന്നുണ്ടാകുമെന്നാണ് വിവരം.