കണ്ണൂർ: തലശേരിയില്‍ റെഡിമെയ്ഡ് കട കത്തിനശിച്ചു.ഇന്ന് പുലർച്ചെയാണ് തീപിടുത്തമുണ്ടായത്. 15 ലക്ഷം രൂപയുടെ തുണിത്തരങ്ങളുടെ സ്റ്റോക്കാണ് കത്തിനശിച്ചത്. തലശേരി നഗരത്തിലെ ടെലിടവറിലെ അപ്‌ഡേറ്റ്‌സ് ജെന്‍സ് ഷോപ്പിലാണ് തീപ്പിടിച്ചത്. ഷോട്ട് സര്‍ക്യൂട്ടാണ് അപകടകാരണമെന്നാണ് പ്രാഥമിക നിഗമനം. കടയിലുണ്ടായിരുന്ന സ്റ്റോക്ക് പൂര്‍ണമായും കത്തിനശിച്ചു.ചൊവ്വാഴ്ച രാവിലെ കട തുറക്കുമ്പോഴാണ് കടയ്ക്കുള്ളില്‍ നിന്നും തീയും പുകയും ഉയരുന്നത് കണ്ടത്. കടയുടമ വിവരം അറിയിച്ചതിനെ തുടര്‍ന്ന് തലശ്ശേരിയില്‍ നിന്നും ഫയര്‍ ഫോഴ്‌സെത്തി തീ അണച്ചു. എ സി യും ഇന്റിരിയറും കത്തി നശിച്ചെന്നും കടയുടമ മുഹമ്മദ് സമീര്‍ പറഞ്ഞു.ഉടമയുടെ പരാതിയില്‍ തലശേരി ടൗണ്‍ പൊലിസ് കേസെടുത്തു അന്വേഷണമാരംഭിച്ചിട്ടുണ്ട്. കഴിഞ്ഞ ദിവസം തലശേരി – മാഹി ദേശീയ പാതയിലെ പുന്നേല്‍ കുറിച്ചിയില്‍ പച്ചക്കറി – പഴവര്‍ഗ കട കത്തി നശിച്ചിരുന്നു.