ലക്നൗ∙ അയോധ്യയിൽ രാമക്ഷേത്രം നിർമിക്കാൻ മുൻകൈയെടുക്കുമെന്നു ഉത്തർപ്രദേശ് മുഖ്യമന്ത്രി യോഗി ആദിതൃനാഥ്. സംസ്ഥാനത്തെ മുഴുവൻ അറവുശാലകളും ഉടൻ അടച്ചുപൂട്ടും. അനധികൃതമായി പ്രവർത്തിക്കുന്ന എല്ലാ അറവുശാലകളും പൂട്ടാൻ ഉത്തരവിറക്കിയിട്ടുണ്ട്. അറവുശാലകൾ മലിനീകരണത്തിനു കാരണമാകുന്നു. ദേശീയ ഹരിത ട്രൈബ്യൂണലും അറവുശാലകള്‍ പൂട്ടണമെന്നു പറഞ്ഞിട്ടുണ്. ഇവിടുത്തെ പരിസ്ഥിതി മലിനീകരണം തടയാനും ഈ നടപടി അത്യാവശ്യമാണ്. ഇതുമായി സർക്കാർ മുന്നോട്ടു പോകുക തന്നെ ചെയ്യും.
ഉത്തർപ്രദേശിന്റെ വികസനം മാത്രമാണു തന്റെ സർക്കാരിന്റെ ലക്ഷ്യം. വികസനത്തിൽ സംസ്ഥാനത്തെ മുന്നിലെത്തിക്കണം. ഉത്തർപ്രദേശിലെ ഗുണ്ടാരാജ് അവസാനിപ്പിക്കും. അഴിമതി തുടച്ചുനീക്കും. സ്ത്രീ സുരക്ഷയ്ക്കും പ്രാധാന്യം കൊടുക്കുന്നുണ്ട്. നിയമത്തിൽ വിശ്വസിക്കുന്നവർക്ക് ഇവിടെ ജീവിക്കാം. അല്ലാത്തവർ ഉത്തർപ്രദേശ് വിട്ടുപോകണമെന്നും യോഗി ആദിത്യനാഥ് പറഞ്ഞു.