കരിപ്പൂർ: വയനാട് എംപിയും കോൺഗ്രസ് നേതാവുമായ രാഹുൽ ഗാന്ധി ഇന്ന് കേരളത്തിൽ. രാവിലെ എട്ടരയ്‌ക്ക് കരിപ്പൂരിൽ എത്തുന്ന രാഹുൽ ഗാന്ധി കെപിസിസി പ്രസിഡണ്ട് കെ സുധാകരൻ ഉൾപ്പെടെയുള്ള മുതിർന്ന നേതാക്കളുമായി കൂടിക്കാഴ്ച നടത്തും.കെപിസിസി നേതൃത്വത്തിനെതിരെ മുതിർന്ന നേതാക്കൾ തുടർച്ചയായി പരസ്യമായി വിമർശനങ്ങൾ ഉന്നയിക്കുന്നതിടെയാണ് രാഹുലിന്റെ വരവ്.കഴിഞ്ഞ ദിവസം രാഷ്‌ട്രീയകാര്യ സമിതിയിൽ നിന്നും മുൻ കെപിസിസി അധ്യക്ഷൻ കൂടിയായ വിഎം സുധീരൻ രാജിവെച്ചിരുന്നു. ഇതിന് പിന്നാലെ എഐസിസി അംഗത്വവും സുധീരൻ രാജിവെച്ചിരുന്നു. കെപിസിസി പുനസംഘടനയുമായി ബന്ധപ്പെട്ട കൂടിയാലോചനകളിൽ പുതിയ നേതൃത്വം അവഗണിച്ചതിൽ പ്രതിഷേധിച്ചാണ് സുധീരന്റെ രാജി. കെ. സുധാകരനും വിഡി സതീശനും അടങ്ങുന്ന പുതിയ നേതൃത്വത്തിന്റെ ഏകപക്ഷീയ നിലപാടിൽ മറ്റ് മുതിർന്ന നേതാക്കളും ശക്തമായ പ്രതിഷേധത്തിലാണ്. ഇതിനിടയിലാണ് രാഹുലിന്റെ സന്ദർശനം.എഐസിസി ജനറല്‍ സെക്രട്ടറി കെ സി വേണുഗോപാലും രാഹുല്‍ ഗാന്ധിക്കൊപ്പം വരുന്നുണ്ട്. അദേഹവും ചര്‍ച്ചയില്‍ പങ്കെടുക്കും. നാളെ രാവിലെ കരിപ്പൂരില്‍ നിന്നും രാഹുല്‍ ഗാന്ധി ന്യൂഡല്‍ഹിയിലേക്ക് മടങ്ങും.