ശ്രീനഗര്:പുല്വാമയില് സൈന്യവും ഭീകരരും തമ്മിലുണ്ടായ ഏറ്റുമുട്ടലില് രണ്ട് ഭീകരരെ വധിച്ചതായി റിപ്പോർട്ട്.കഴിഞ്ഞ ദിവസം 40 സൈനികരുടെ ജീവനെടുത്ത ആക്രമണത്തിന് നേതൃത്വം നല്കിയ ആദില് അഹമ്മദ് ധറിന്റെ കൂട്ടാളികളായ കമ്രാന്, ഗാസി എന്നീ ജെയ്ഷെ മുഹമ്മദ് ഭീകരരാണ് കൊല്ലപ്പെട്ടതെന്നാണ് റിപ്പോര്ട്ടുകള് സൂചിപ്പിക്കുന്നത്.എന്നാല്, ഇക്കാര്യത്തില് സൈന്യത്തിന്റെ ഔദ്യോഗിക വിശദീകരണം ലഭ്യമായിട്ടില്ല.ഭീകരര് ഒളിച്ചിരുന്ന കെട്ടിടം സൈനികര് വളഞ്ഞതിനെ തുടര്ന്ന് ഭീകരര് നടത്തിയ വെടിവയ്പ്പില് ഒരു മേജര് അടക്കം 4 സൈനികര് വീരമൃത്യുവരിച്ചിരുന്നു. സംഭവത്തില് ഒരു സൈനികന് പരുക്കേറ്റു.അതേസമയം, ഏറ്റുമുട്ടല് ഇപ്പോഴും തുടരുകയാണ്. ഭീകരര് ഒളിച്ചിരുന്ന കെട്ടിടം സൈന്യം വളഞ്ഞിരിക്കുകയാണ്.സിആര്പിഎഫ് വാഹനത്തിന് നേരെ ആക്രമണമുണ്ടായ സ്ഥലത്തിന് രണ്ട് കിലോ മീറ്റര് ചുറ്റളവില് ഭീകരര് ഒളിച്ചിരിക്കുന്നുവെന്ന രഹസ്യ വിവരത്തെ തുടര്ന്നാണ് സൈന്യവും പൊലീസും സംയുക്തമായി തിരച്ചില് ആരംഭിച്ചത്.