കണ്ണൂർ: ചിറക്കലില്‍ കെ. റെയില്‍ സര്‍വ്വേ കല്ലിടല്‍ പ്രതിഷേധക്കാർ തടഞ്ഞു. കുറ്റിയിടാനെത്തിയ ഉദ്യോഗസ്ഥരെ പ്രദേശവാസികളും, കെ- റയില്‍സില്‍വര്‍ ലൈന്‍ വിരുദ്ധ ജനകീയ സമിതി പ്രവര്‍ത്തകരും ചേർന്നാണ് തടഞ്ഞത്.ഇന്നു രാവിലെ ചിറക്കല്‍ റയില്‍വേ ഗേറ്റിനു സമീപമായിരുന്നു പ്രതിഷേധം നടന്നത്.വിവരം അറിഞ്ഞ് കൂടുതല്‍ പൊലീസ് സ്ഥലത്തെത്തി. കെ- റെയില്‍ സില്‍വര്‍ ലൈന്‍ വിരുദ്ധ ജനകീയ സമിതി ജില്ലാ കണ്‍വീനര്‍ അഡ്വ. പി. സി.വിവേകിനെയും ജില്ലാ നേതാവ് അഡ്വ. ആര്‍.അപര്‍ണയെയും വളപട്ടണം പൊലീസ് അറസ്റ്റുചെയ്ത് വലിച്ചിഴച്ചാണ് സ്റ്റേഷനില്‍ കൊണ്ട് പോയതെന്ന് പ്രതിഷേധക്കാർ ആരോപിച്ചു. തുടര്‍ന്ന് കല്ലിടല്‍ തുടരുകയും ചെയ്തു. ഉണ്ണികൃഷ്ണന്‍, രാജേന്ദ്രന്‍, പ്രമോദ്, ബിനീഷ് എന്നിവര്‍ പ്രതിഷേധത്തിന് നേതൃത്വം നല്‍കി. പൊലീസ് നടപടിക്കെതിരേ ഇന്നു വൈകിട്ട് ചിറക്കല്‍ ഗേറ്റില്‍ പ്രതിഷേധ യോഗം സംഘടിപ്പിക്കുമെന്ന് അഡ്വ. പി.സി. വിവേക് അറിയിച്ചു.