ഇരിട്ടി:കനത്ത മഴയും മണ്ണിടിച്ചിലിനെയും തുടർന്ന് കേരള-കർണാടക അന്ത സംസ്ഥാന പാതയിൽ മാക്കൂട്ടം ചുരം റോഡിലൂടെ വലിയ വാഹനങ്ങൾക്ക് ഏർപ്പെടുത്തിയ ഗതാഗത നിരോധനം മഴ കഴിയും വരെ തുടരും.റോഡിന്റെ നവീകരണ പ്രവർത്തി കാലവർഷം കഴിഞ്ഞാലേ ആരംഭിക്കുകയുള്ളൂ.അതിനു ശേഷം മാത്രമേ വലിയ വാഹനങ്ങൾക്ക് ഏർപ്പെടുത്തിയിരിക്കുന്ന നിരോധനം പിൻവലിക്കുകയുള്ളൂ.പൂർണ്ണ സുരക്ഷ ഉറപ്പുവരുത്തി മാത്രമേ വലിയ വാഹനങ്ങൾ കടത്തിവിടുകയുള്ളൂ എന്ന് മടിക്കേരി അസിസ്റ്റന്റ് കമ്മീഷണർ ശ്രീവിദ്യ പറഞ്ഞു.16 കിലോമീറ്ററോളം വരുന്ന ചുരം റോഡിൽ 99 ഇടങ്ങളിലാണ് മണ്ണിടിച്ചിൽ ഉണ്ടായത്.മാക്കൂട്ടം മുതൽ പെരുമ്പാടി വരെ നാലിടങ്ങളിൽ റോഡ് ഇടിഞ്ഞുപോവുകയും ചെയ്തിരുന്നു.ഇവിടങ്ങളിൽ താൽക്കാലിക അറ്റകുറ്റപ്പണി നടത്തി ചെറിയ വാഹനങ്ങൾക്കുള്ള ഗതാഗത നിയന്ത്രം ഒരു മാസം മുൻപ് പിൻവലിച്ചിരുന്നു.ഇടിഞ്ഞ ഭാഗങ്ങളിൽ ബാരിക്കേഡുകൾ സ്ഥാപിച്ച് ഒരു സമയത്ത് ഒരു വാഹനം മാത്രം കടന്നു പോകാനുള്ള സംവിധാനമാണ് ഏർപ്പെടുത്തിയിരിക്കുന്നത്.ബസ് ഗതാഗതം ഇല്ലാത്തതിനാൽ കൂട്ടുപുഴയിൽ നിന്നും പെരുമ്പാടിയിൽ നിന്നും സമാന്തര സർവീസുകളും ആരംഭിച്ചിട്ടുണ്ട്.