കണ്ണൂർ: കണ്ണൂരിൽ സിപിഎം -കോൺഗ്രസ് സംഘർഷ സാദ്ധ്യതയെന്ന് റിപ്പോർട്ട്.ഈ സാഹചര്യത്തിൽ പാർട്ടി ഓഫീസുകൾക്ക് സുരക്ഷ ഏർപ്പെടുത്താൻ പൊലീസിന് നിർദ്ദേശം നൽകി. ഓഫീസുകൾ ആക്രമിക്കപ്പെടാനുള്ള സാധ്യത മുന്നിൽക്കണ്ട് സിറ്റി പോലീസ് കമ്മീഷണർ ആർ ഇളങ്കോയാണ് നിർദ്ദേശം നൽകിയത്.മുഴുവൻ സേനാംഗങ്ങളോടും അവധി റദ്ദാക്കി തിരിച്ചെത്താൻ ഉത്തരവിട്ടു. ജില്ലയിൽ പെട്രോളിങും പരിശോധനകളും വർധിപ്പിക്കണം. പോലീസ് സ്‌റ്റേഷനിൽ ഡ്യൂട്ടിയിൽ അല്ലാത്ത പോലീസുകാർ സ്‌റ്റേഷൻ പരിധി വിട്ട് പോകാൻ പാടില്ലെന്നും നിർദ്ദേശത്തിൽ പറയുന്നു.ഇടുക്കി ഗവ എൻജിനീയറിംഗ് കോളേജിൽ എസ്എഫ്ഐ പ്രവർത്തകനായ ധീരജ് കൊല്ലപ്പെട്ട സംഭവത്തിന് പിന്നാലെ കേരളത്തിൽ സംഘർഷങ്ങൾ വർദ്ധിച്ചിരിക്കുകയാണ്. സംസ്ഥാനത്ത് വിവിധ ഇടങ്ങളിലായി സിപിഎമ്മും ഇടത് വിദ്യാർത്ഥി സംഘടനകളും ചേർന്ന് വ്യാപക പ്രതിഷേധങ്ങളാണ് അഴിച്ചുവിടുന്നത്. ഇതിനെതിരെ കോൺഗ്രസും രംഗത്തെത്തിയിട്ടുണ്ട്. ഈ സാഹചര്യത്തിലാണ് കണ്ണൂരിൽ സുരക്ഷ കർശനമാക്കിയിരിക്കുന്നത്.