കണ്ണൂര്‍: കുട്ടികള്‍ക്കെതിരായ ലൈംഗികാതിക്രമങ്ങള്‍ തടയുകയെന്ന ലക്ഷ്യത്തോടെ കൊണ്ടുവന്ന പോക്‌സോ നിയമങ്ങള്‍ പ്രതികാരം ചെയ്യാന്‍ ദുരുപയോഗം ചെയ്യുന്ന പ്രവണത കൂടിവരുന്നതായി സംസ്ഥാന വനിതാ കമ്മീഷനംഗം അഡ്വ. നൂര്‍ബിന റഷീദ് .പീഡനവിവരം പുറത്തുവിടാതിരിക്കുന്ന രക്ഷിതാക്കളും പോക്‌സോ നിയമപ്രകാരം കുറ്റക്കാരാണ്. റസിഡന്റ് അസോസിയേഷനുകളെ കുറിച്ചും പരാതികള്‍ വ്യാപകമാണ്. അണുകുടുംബങ്ങളില്‍ കുടുംബാന്തരീക്ഷം തകര്‍ന്നുകൊണ്ടിരിക്കുന്നു. ഇന്റര്‍നെറ്റിലെ അശ്ലീലസൈറ്റുകള്‍ നിരോധിക്കാന്‍ നടപടി വേണം.കലാലയങ്ങളിലും വീടുകളിലുമെല്ലാം പീഡനം വര്‍ധിക്കാന്‍ കാരണം വിരല്‍തുമ്പില്‍ തന്നെ അശ്ലീലത ലഭിക്കുന്നതാണ്. കുറ്റകൃത്യങ്ങളുണ്ടായാല്‍ പോലിസന്വേഷണം കുറ്റമറ്റതാവണം. പി റോസക്കുട്ടി ചെയര്‍പേഴ്‌സനായ സംസ്ഥാന വനിതാ കമ്മീഷന്റെ അവസാനത്തെ സിറ്റിങാണിത്. ഏപ്രില്‍ മൂന്നിനു സ്ഥാനമൊഴിയും. ഇതുവരെ ലഭിച്ച പിന്തുണയ്ക്കും പ്രോല്‍സാഹനത്തിനും കൃതജ്ഞത രേഖപ്പെടുത്തുന്നതായി അഡ്വ. നൂര്‍ബിന റഷീദ് പറഞ്ഞു