ന്യൂഡൽഹി:രാജ്യത്ത് ആദ്യമായി പെട്രോള്‍വില മൂന്നക്കം പിന്നിട്ടു.പെട്രോളിന് 25 പൈസയും ഡീസലിന് 26 പൈസയുമാണ് ഇന്ന് കൂടിയത്.രാജസ്ഥാനിലാണ് പെട്രോളിന്റെ വില ലിറ്ററിന് 100 പിന്നിട്ടത്. രാജസ്ഥാനിലെ ശ്രീഗംഗാനഗറില്‍ ഇന്ത്യന്‍ ഓയില്‍ കോര്‍പ്പറേഷന്റെ (ഐ ഒ സി) പമ്പുകളിലാണ് പെട്രോള്‍ വില നൂറ് കഴിഞ്ഞ് കുതിക്കുന്നത്. ഇന്ന് രാവിലെയുണ്ടായ വിലക്കയറ്റത്തിന് ശേഷം ഡല്‍ഹിയില്‍ പെട്രോളിന് ലിറ്ററിന് 89.54 രൂപയും ഡീസലിന് 79.95 രൂപയുമാണ് വില. മുംബയില്‍ പെട്രോള്‍ വില ലിറ്ററിന് 96 രൂപയും ഡീസലിന് 86.98 രൂപയുമാണ്.നവംബര്‍ 19 മുതലാണ് എണ്ണ വിപണന കമ്പനികൾ പെട്രോളിന്റെയും ഡീസലിന്റെയും വില തുടര്‍ച്ചയായി വര്‍ദ്ധിപ്പിക്കാന്‍ തുടങ്ങിയത്. 2018ല്‍ പെട്രോള്‍,ഡീസല്‍ വില കുതിച്ച്‌ കയറിയതോടെ സര്‍ക്കാര്‍ ചില നടപടികള്‍ സ്വീകരിച്ചിരുന്നു. പെട്രോളിന്റേയും ഡീസലിന്റേയും എക്‌സൈസ് തീരുവ ലിറ്ററിന് ഒന്നര രൂപ വീതം കുറയ്‌ക്കുകയായിരുന്നു അന്ന് ചെയ്തത്. ഇതു കൂടാതെ സര്‍ക്കാര്‍ എണ്ണ കമ്പനികൾ ലിറ്ററിന് ഒരു രൂപ കുറയ്‌ക്കുകയും ചെയ്‌തിരുന്നു.ഇന്ത്യയില്‍ എണ്ണവില നിശ്ചയിക്കപ്പെടുന്നത് രാജ്യാന്തര വിപണിയിലെ അസംസ്‌കൃത വിലയെ അടിസ്ഥാനമാക്കിയാണ്. അതിനൊപ്പം തന്നെ ഡോളറിന്റെ മൂല്യവും ഇതില്‍ നിര്‍ണായകമായ പങ്കുവഹിക്കുന്നുണ്ട്.