ബെംഗളൂരു:കേരളമടക്കം നാല് സംസ്ഥാനങ്ങളില്‍ നിന്നുള്ളവര്‍ കര്‍ണാടകയില്‍ പ്രവേശിക്കുന്നതിന് വിലക്ക് ഏർപ്പെടുത്തി.മഹാരാഷ്ട്ര, ഗുജറാത്ത്, തമിഴ്‌നാട്, കേരളം എന്നീ സംസ്ഥാനങ്ങളില്‍ നിന്നുളളവര്‍ മെയ് 31 വരെ സംസ്ഥാനത്ത് പ്രവേശിക്കരുതെന്ന് കര്‍ണാടക സര്‍ക്കാര്‍ അറിയിച്ചു.മഹാരാഷ്ട്ര, ഗുജറാത്ത്, തമിഴ്‌നാട് സംസ്ഥാനങ്ങളില്‍ കൊവിഡ് ഏറ്റവും തീവ്രമായ തോതില്‍ വ്യാപിച്ച ഇടങ്ങളാണ്. ഇതിനൊപ്പമാണ് കേരളത്തില്‍നിന്നുള്ളവര്‍ക്കും കര്‍ണാടകം വിലക്ക് ഏര്‍പ്പെടുത്തിയിട്ടുള്ളത്.നേരത്തെ തന്നെ കേരള അതിര്‍ത്തിയിലെ റോഡുകള്‍ മണ്ണിട്ട് അടച്ചും മംഗലാപുരത്തേക്ക് ചികിത്സയ്ക്ക് പോകുന്നത് തടഞ്ഞും കര്‍ണാടകം വിലക്ക് ഏര്‍പ്പെടുത്തിയിരുന്നു. മെയ് 31 വരെ ലോക്ഡൗണ്‍ നീട്ടിയ കേന്ദ്രസര്‍ക്കാര്‍ തീരുമാനം വന്നതിന് പിന്നാലെയാണ് കര്‍ണാടകത്തിന്റെ ഈ പ്രഖ്യാപനം. ഇരു സംസ്ഥാനങ്ങള്‍ തമ്മിലുള്ള പരസ്പര ധാരണയനുസരിച്ച്‌ ജനങ്ങളെ കടത്തിവിടാം എന്നാണ് കേന്ദ്ര സര്‍ക്കാരിന്റെ പുതുക്കിയ ലോഗ്ഡൗണ്‍ മാര്‍ഗരേഖ. ഇതിനെ തുടര്‍ന്നാണ്‌ കര്‍ണാടകയുടെ പുതിയ തീരുമാനം പുറത്തുവന്നത്. കേന്ദ്ര സര്‍ക്കാരിന്റെ മാര്‍ഗരേഖ പുറത്തിറങ്ങിയതിന് ശേഷം മറ്റ് മന്ത്രിമാരുമായി കൂടിയാലോചിച്ചാണ് വിലക്കിന്റെ കാര്യം മുഖ്യമന്ത്രി ബിഎസ് യെദ്യൂരപ്പ പ്രഖ്യാപിച്ചത്. അതേസമയം കര്‍ണാടകം സംസ്ഥാനത്തിനകത്ത് ലോക്ഡൗണില്‍ പല ഇളവുകളും പ്രഖ്യാപിച്ചിട്ടുണ്ട്. ഏറ്റവും കൂടുതല്‍ കൊവിഡ് കേസുകള്‍ റിപ്പോര്‍ട്ട ചെയ്യപ്പെട്ട ദിവസം തന്നെയാണ് ഇളവുകള്‍ പ്രഖ്യാപിച്ചത് എന്നതാണ് പ്രത്യേകത. 84 പേര്‍ക്ക് ഒറ്റ ദിവസം കര്‍ണാടകത്തില്‍ കൊവിഡ് സ്ഥിരീകരിച്ചു. ഇതുവരെ 1231 പേര്‍ക്കാണ് കര്‍ണാടകത്തില്‍ കൊവിഡ് സ്ഥിരീകരിച്ചിട്ടുള്ളത്.സംസ്ഥാനത്ത് സര്‍ക്കാര്‍ ബസുകളുടെ സര്‍വീസും പുനരാരംഭിച്ചു. റെഡ് സോണ്‍ ഒഴികെയുള്ള സ്ഥലങ്ങളിലാണ് യാത്രാനുമതി. ബസില്‍ 30 യാത്രക്കാരെ മാത്രമേ അനുവദിക്കുകയുള്ളൂ.ഒല, ഉബര്‍ തുടങ്ങിയ ടാക്‌സി കാബ് ഓപ്പറേറ്റര്‍മാര്‍ക്കും കര്‍ണാടകം പ്രവര്‍ത്തനാനുമതി നല്‍കി. എല്ലാ യാത്രക്കാര്‍ക്കും 14 ദിവസത്തെ ക്വാറന്റൈന്‍ നിര്‍ദേശിച്ചിട്ടുണ്ട്. കേരളത്തെ പോലെ തന്നെ കര്‍ണാടകത്തിലും ഇനി മുതല്‍ ഞായറാഴ്ചകളില്‍ പൂര്‍ണ ലോക്ഡൗണ്‍ ആയിരിക്കും.