ബംഗളുരു: കാനറ ബാങ്ക് പത്തനംതിട്ട ശാഖയില്‍ നിന്ന് കോടികൾ തട്ടിയെടുത്ത കേസില്‍ കാഷ്യര്‍ പിടിയില്‍. ആവണീശ്വരം സ്വദേശി വിജീഷ് വര്‍ഗീസാണ് അറസ്റ്റിലായത്. ബംഗളുരുവില്‍ നിന്നാണ് ഇയാൾ പിടിയിലായത്.കസ്റ്റഡിയിലെടുക്കുമ്പോള്‍ പ്രതിക്കൊപ്പം ഭാര്യയും രണ്ടു കുട്ടികളും വീട്ടില്‍ ഉണ്ടായിരുന്നു. ഇന്ന് ഉച്ചയോടെ വിജീഷുമായി പോലീസ് സംഘം പത്തനംതിട്ടയില്‍ എത്തിച്ചേരും. തട്ടിപ്പില്‍ വിജേഷിന് മാത്രമാണ് പങ്കുള്ളതെന്നാണ് പ്രാഥമിക വിലയിരുത്തല്‍.8 കോടി പതിമൂന്ന് ലക്ഷം രൂപയാണ് ഇയാള്‍ ബാങ്കിൽ നിന്നും വെട്ടിച്ചത്. കാനറ ബാങ്ക് രണ്ടാംശാഖയിലെ കാഷ്യര്‍ കം ക്ലര്‍ക്കാണ് ഇയാള്‍. ദീര്‍ഘകാലത്തേക്കുള്ള സ്ഥിരനിക്ഷേപങ്ങളിലെയും കാലാവധി പിന്നിട്ടിട്ടും പിന്‍വലിക്കാത്ത അക്കൗണ്ടുകളിലെയും പണമാണ് തട്ടിയെടുത്തത്. 14 മാസം കൊണ്ട് 191 ഇടപാടുകളിലായാണ് തട്ടിപ്പ് നടത്തിയത്. 10 ലക്ഷം രൂപ നിക്ഷേപിച്ചിരുന്ന ഒരു അക്കൗണ്ട് ഉടമ അറിയാതെ ക്ലോസ് ചെയ്തുവെന്ന പരാതിയിലാണ് ബാങ്ക് അധികൃതര്‍ പരിശോധന നടത്തിയത്. തുടര്‍ന്ന് നടത്തിയ ഓഡിറ്റിലാണ് കോടികളുടെ ക്രമക്കേട് നടന്നതായി വ്യക്തമാകുന്നത്.