പാപ്പിനിശ്ശേരി: പാപ്പിനിശ്ശേരി പഞ്ചായത്തിന്റെ നേതൃത്വത്തില്‍ ഹരിതകേരളം പദ്ധതിയുടെ ഭാഗമായി ദേശീയപാതയോരത്ത് സ്ഥാപിക്കുന്ന താത്കാലിക വിശ്രമകേന്ദ്രത്തിന്റെ ഉദ്ഘാടനം പഞ്ചായത്ത് പ്രസിഡന്റ് കെ.നാരായണന്‍ നിര്‍വഹിച്ചു. പാപ്പിനിശ്ശേരി ടെലിഫോണ്‍ എക്‌സ്‌ചേഞ്ചിന് എതിര്‍വശം ദേശീയപാതയോരത്തെ 150 മീറ്റര്‍ ഭാഗമാണ് ശുചീകരിച്ച് വിശ്രമകേന്ദ്രമാക്കുന്നത്. ഇരിപ്പിടസൗകര്യത്തോടെ പ്രകൃതിയോടിണങ്ങുന്നരീതിയില്‍ നിര്‍മിക്കുന്ന വിശ്രമകേന്ദ്രത്തിനുസമീപം പൊതു ടോയ്‌ലറ്റും സ്ഥാപിക്കും. ചടങ്ങില്‍ കോട്ടൂര്‍ ഉത്തമന്‍ അധ്യക്ഷനായിരുന്നു. ഉപ്പേരി വത്സന്‍, പി.വി.രാജീവന്‍, കെ.പ്രമീള, പോള രാജന്‍, ടി.വി.രാജീവന്‍, പഞ്ചായത്ത് സെക്രട്ടറി ജെയ്‌സണ്‍ മാത്യു എന്നിവര്‍ പ്രസംഗിച്ചു.