ഇരിട്ടി: പച്ചക്കറി ലോഡ് എന്ന വ്യാജേന കടത്തുകയായിരുന്ന പാന്‍ ഉല്‍പന്ന ശേഖരം പൊലീസ് പിടികൂടി.10500 പാക്കറ്റ് പാന്‍ ഉല്‍പന്നങ്ങളും കടത്താന്‍ ഉപയോഗിച്ച മിനി ലോറിയുമാണ് പിടികൂടിയത് .വാഹനത്തില്‍ ഉണ്ടായിരുന്ന മൊകേരി കൂരാറ പുത്തന്‍വീട്ടില്‍ സജിത്ത് (35 ), മാഹി പള്ളൂരിലെ നാലുതറയില്‍ സുഭാഷ് (34) എന്നിവരെ അറസ്റ്റ് ചെയ്തു.14 ചാക്കുകളിലായി നിരോധിത ഉല്‍പന്നങ്ങളായ ഹാന്‍സ്, കൂള്‍ ലിപ്സ് എന്നിവ നിറച്ചു അടിത്തട്ടില്‍ ഒളിപ്പിച്ച്‌ മുകളില്‍ ലോറിയുടെ പ്ലാറ്റ് ഫോം അടിക്കുന്ന അതേ ഇരുമ്പ് ഷീറ്റ് വച്ചു. തുടര്‍ന്നു ലോറിയില്‍ കൊള്ളുന്ന അത്രയും പച്ചക്കറിയും നിറച്ചിരുന്നു. രഹസ്യ വിവരത്തിന്റെ അടിസ്ഥാനത്തില്‍ പൊലീസ് സ്റ്റേഷനു മുന്നില്‍ വാഹനം തടഞ്ഞു. ജീവനക്കാര്‍ ഒന്നും ഇല്ലെന്നു ഉറപ്പിച്ചു പറഞ്ഞു. കമ്പി കൊണ്ടു കുത്തി നോക്കിയപ്പോഴും അസ്വാഭാവികമായി ഒന്നും കണ്ടെത്തിയില്ല. രഹസ്യ വിവരം ഉണ്ടായിരുന്നതിനാല്‍ പൊലീസ് വാഹനത്തില്‍ ഉണ്ടായിരുന്നവരെ വലയം ചെയ്ത ശേഷം ലോഡ് ഇറക്കി പരിശോധിച്ചപ്പോഴാണു അടിത്തട്ടില്‍ ഷീറ്റിട്ടു നിലയിൽ സൂക്ഷിച്ച പാന്‍ ഉല്‍പന്ന ശേഖരം കണ്ടെത്തിയത്.കര്‍ണാടകയിലെ ഹുന്‍സൂര്‍ മേഖലയില്‍ നിന്നാണു പാന്‍ ഉല്‍പന്നങ്ങള്‍ വാങ്ങിയതെന്നാണു പൊലീസിനു ലഭിച്ച വിവരം. കേരളത്തില്‍ എത്തുമ്പോൾ 5 ഇരട്ടിയാണ് വില. ഇതനുസരിച്ചു ഇന്നലെ പിടിയിലായ പാന്‍ ഉല്‍പന്ന ശേഖരത്തിന് 5.25 ലക്ഷം രൂപ വിലമതിക്കും.