കോട്ടയം: കെഎം മാണിയുടെ നിര്യാണത്തെ തുടര്‍ന്ന് ഒഴിവ് വന്ന പാലാ നിയമസഭ സീറ്റിലേക്കുള്ള ഉപതിരഞ്ഞെടുപ്പിൽ സ്ഥാനാർത്ഥിയെ നിർണയിക്കുന്നതിനുള്ള തർക്കം കോൺഗ്രസ്സിൽ രൂക്ഷമായി.കേരള കോണ്‍ഗ്രസ് എമ്മിലെ തര്‍ക്കങ്ങളില്‍ സമവായമുണ്ടാക്കാനാണ് യുഡിഎഫിന്റെ തീരുമാനം എന്ന് പ്രതിപക്ഷ നേതാവ് രമേശ് ചെന്നിത്തല മാദ്ധ്യമങ്ങളോട് പറഞ്ഞു.നിലവില്‍ പിജെ ജോസഫ് ജോസ് കെ മാണി വിഭാഗങ്ങളിലിടയിലുള്ള തര്‍ക്കങ്ങളും അഭിപ്രായഭിന്നതകളും പരിഹരിക്കാന്‍ ഉഭയകക്ഷി ചര്‍ച്ച നടത്തുമെന്നും ചെന്നിത്തല വ്യക്തമാക്കി. അതേസമയം പാലയില്‍ ജയ സാധ്യതയുള്ള സ്ഥാനാര്‍ഥി വേണമെന്ന് ജോസഫ് വിഭാഗം ആവശ്യപ്പെട്ടു.പാലാ തെരഞ്ഞെടുപ്പിലെ കേരളാ കോണ്‍ഗ്രസ്സ് എമ്മിന്റെ സ്ഥാനാര്‍ത്ഥിയെ ജോസ് കെ മാണി തീരുമാനിക്കുമെന്ന് റോഷി അഗസ്റ്റിന്‍ എംഎല്‍എ പറഞ്ഞിരുന്നു. സ്റ്റിയറിംഗ് കമ്മറ്റി സ്ഥാനാര്‍ത്ഥിയെ തീരുമാനിക്കുമെന്ന പിജെ ജോസഫിന്റെ വാദത്തെ തള്ളിയാണ് എംഎല്‍എയുടെ പ്രതികരണം.
അതേസമയം തര്‍ക്കം രൂക്ഷമായ സാഹചര്യത്തില്‍ ഇരു വിഭാഗത്തിനും അംഗീകരിക്കാന്‍ സാധിക്കുന്ന സ്ഥാനാര്‍ത്ഥിയെ കണ്ടെത്താനുള്ള നീക്കം സജീവമായി. ജോസ് കെ. മാണി വിഭാഗത്തിനൊപ്പം നില്ക്കുന്ന ഇ.ജെ അഗസ്തി സ്ഥാനാര്‍ത്ഥിയായേക്കുമെന്ന സൂചനയാണ് ലഭിക്കുന്നത്. ജോസഫ് വിഭാഗവും കോണ്‍ഗ്രസും അഗസ്തിയുടെ സ്ഥാനാര്‍ത്ഥിത്വം എതിര്‍ക്കില്ലെന്നാണ് സൂചന.നിഷാ ജോസ് കെ. മാണിയെ സ്ഥാനാര്‍ത്ഥിയാക്കാന്‍ സാധിക്കില്ലെന്ന നിലപാടിലാണ് പി.ജെ ജോസഫ് വിഭാഗം ജോസ് കെ. മാണിക്കും സീറ്റ് നല്കാനാകില്ലെന്നാണ് ഇവര്‍ പറയുന്നത്. ഇന്നലെ കോട്ടയത്ത് ചേര്‍ന്ന ഗ്രൂപ്പ് യോഗത്തില്‍ ജോസഫ് വിഭാഗം ഇക്കാര്യം വിശദമായി ചര്‍ച്ച ചെയ്തു. എന്നാല്‍ നിലവില്‍ ജോസ് പക്ഷത്തുള്ള പഴയ കേരള കോണ്‍ഗ്രസ് ജില്ലാ പ്രസിഡന്റ് ഇ.ജെ അഗസ്തിയുടെ പേരും ഇതോടെ ഉയര്‍ന്ന് കേള്‍ക്കുന്നുണ്ട്. അഗസ്തിയെ സ്ഥനാര്‍ത്ഥിയായി വന്നാല്‍ ജോസഫ് വിഭാഗവും കോണ്‍ഗ്രസും ഇതിനെ എതിര്‍ക്കില്ല. അതുകൊണ്ട് തന്നെ പൊതു സമ്മതനായ ഒരു സ്ഥാനാര്‍ത്ഥിയായിട്ടാണ് ഇ.ജെ അഗസ്തിയെ പരിഗണിക്കുന്നത്.യു.ഡി.എഫ് യോഗത്തില്‍ ഇക്കാര്യമെല്ലാം വിശദമായി ചര്‍ച്ച ചെയ്യും. അതിന് ശേഷം സംസ്ഥാന യു.ഡി.എഫ് ചേര്‍ന്ന് അന്തിമ തീരുമാനം എടുത്തായിരിക്കും സ്ഥനാര്‍ത്ഥിയെ പ്രഖ്യാപിക്കുക.