പത്തനംതിട്ട:ശബരിമലയിലെ ഭണ്ഡാരത്തിൽ നിന്നും റോക്കറ്റിന്റെ രൂപത്തിൽ മടക്കിയ ഇരുപതു രൂപയുടെ പാകിസ്ഥാൻ നോട്ട് ലഭിച്ചു.ഇതിനെകുറിച്ച് പോലീസും രഹസ്യാന്വേഷണ വിഭാഗങ്ങളും അന്വേഷണം ആരംഭിച്ചു.കുട്ടികൾ പേപ്പർ കൊണ്ട് ഉണ്ടാക്കുന്ന തരത്തിലുള്ള റോക്കറ്റിന്റെ ആകൃതിയിൽ മടക്കിയ നോട്ടുകൾ ഭണ്ഡാരം ജീവനക്കാർക്ക് ലഭിക്കുകയായിരുന്നു.ജൂലൈ ഒന്നിന് നട തുറന്നതിനു ശേഷമാണ് ശ്രീകോവിലിനു മുൻപിലെ ഭണ്ഡാരത്തിൽ നോട്ട് നിക്ഷേപിച്ചതെന്നു വ്യക്തമായിട്ടുണ്ട്.സി.സി.ടി.വി ദൃശ്യങ്ങൾ പോലീസ് പരിശോധിച്ചു വരികയാണ്.ജൂലൈ ഒന്നിന് ഉച്ചവരെയുള്ള കാണിക്ക എണ്ണിത്തിട്ടപ്പെടുത്തിയിരുന്നു.തുടർന്നുള്ള കാണിക്ക മൂന്നാംതീയതി എണ്ണിയപ്പോഴാണ് പാകിസ്ഥാൻ നോട്ട് കണ്ടെത്തിയത്.ശബരിമലയിലെ ഭണ്ഡാരങ്ങളിൽ നിന്നും നൂറിലേറെ രാജ്യങ്ങളുടെ കറൻസി ലഭിക്കാറുണ്ട്.ഇങ്ങനെ ലഭിക്കുന്ന പാകിസ്ഥാൻ നോട്ടുകളെ പറ്റി ദേവസ്വം അധികൃതർ പോലീസിൽ വിവരം അറിയിക്കാറുണ്ട്.എന്നാൽ അസാധാരണമായ നിലയിൽ കറൻസി കണ്ടതാണ് അന്വേഷണത്തിന് വഴിവെച്ചത്.