കണ്ണൂർ:വളപട്ടണം കീരിയാട്ട് ഇതരസംസ്ഥാന തൊഴിലാളി മോഷ്ട്ടാക്കളുടെ കുത്തേറ്റ് മരിച്ചു. ഒഡിഷ സ്വദേശി പ്രഭാകർ ദാസ്(45) ആണ് മരിച്ചത്.ഇന്നലെ അർധരാത്രിയിലാണ് സംഭവം. കനത്ത മഴയും കാറ്റും ഉണ്ടായിരുന്നതിനാൽ ആ സമയത്ത് വൈദ്യുതി ഉണ്ടായിരുന്നില്ല.ഹിന്ദി ഭാഷ സംസാരിക്കുന്ന ആറുപേർ പ്രഭാകർ ദാസ് താമസിക്കുന്ന മുറിയുടെ വാതിലിൽ മുട്ടുകയായിരുന്നു.വാതിൽ തുറന്നെത്തിയ പ്രഭാകർ ദാസിനെ സംഘം ആക്രമിക്കുകയും മുറിയിൽ നിന്നും മൂന്നു മാലയും സ്വർണ്ണാഭരങ്ങളും കവരുകയും ചെയ്തു. മുറിയിലുണ്ടായിരുന്ന പ്രഭാകർ ദാസിന്റെ ഭാര്യ ലക്ഷ്മിപ്രിയ ദാസിനും പരിക്കേറ്റു.ഇവരെ കണ്ണൂരിലെ സ്വകാര്യ ആശുപത്രിയിൽ പ്രവേശിപ്പിച്ചിരിക്കുകയാണ്.കുറേകാലമായി കീരിയാട്ടെ വാടക ക്വാർട്ടേഴ്സിലാണ് പ്രഭാകർ താമസിക്കുന്നത്.ജോലിക്കായി മറുനാടൻ തൊഴിലാളികളെ എത്തിച്ചുകൊടുക്കുന്ന ജോലിയാണ് പ്രഭാകർ ചെയ്തിരുന്നത്.മോഷണശ്രമത്തിനിടെയാണ് കൊലപാതകമെന്നാണ് പ്രാഥമിക നിഗമനം.എന്നാൽ തൊഴിലാളികൾ തമ്മിൽ പ്രശ്നങ്ങൾ ഉണ്ടായിരുന്നോ എന്നും അന്വേഷിച്ചു വരുന്നതായി കണ്ണൂർ ടൌൺ എസ്‌ഐ ശ്രീജിത്ത് കോടേരി പറഞ്ഞു.