കണ്ണൂർ:കേളകം കണിച്ചാര്‍ ചെങ്ങോത്ത് ഒരു വയസ്സുകാരിയെ ക്രൂരമായി മർദിച്ച സംഭവത്തിൽ അമ്മയും കൂടെ താമസിക്കുന്ന യുവാവും അറസ്റ്റിൽ. ചെങ്ങോംവിട്ടയത്ത് രമ്യ (24), ഒപ്പം താമസിക്കുന്ന കൊട്ടിയൂര്‍ പാലുകാച്ചിയിലെ പുത്തന്‍വീട്ടില്‍ രതീഷ് (39) എന്നിവരെയാണ് കേളകം പൊലീസ് അറസ്റ്റ് ചെയ്തത്.ഇവര്‍ക്കെതിരെ ജുവനൈല്‍ ജസ്റ്റിസ് ആക്‌ട് അനുസരിച്ച്‌ കേസെടുത്തിട്ടുണ്ട്. രതീഷാണ് കുട്ടിയെ മര്‍ദ്ദിച്ചത്. മര്‍ദ്ദിക്കുന്നത് തടയാതിരുന്നതിനാണ് അമ്മയ്‌ക്കെതിരെ കേസ്.ശനിയാഴ്ച വൈകിട്ട് എട്ടുമണിയോടെയാണ് സംഭവം. മുഖത്തും തലയിലും പരിക്കേറ്റ ഒരു വയസുകാരി അഞ്ജനയെ രമ്യയുടെ അമ്മയാണ് പേരാവൂര്‍ താലൂക്ക് ആശുപത്രിയില്‍ കൊണ്ടുവന്നത്. പ്രാഥമിക പരിശോധനയില്‍ മര്‍ദ്ദനമേറ്റതാണെന്ന് മനസിലായ ആശുപത്രി അധികൃതര്‍ പൊലീസിനെ അറിയിക്കുകയായിരുന്നു.തുടര്‍ന്ന് വിശദപരിശോധനയ്ക്ക് കുഞ്ഞിനെ കണ്ണൂര്‍ ഗവ. മെഡിക്കല്‍ കോളേജിലേക്ക് മാറ്റി.കുട്ടിയുടെ പരിക്ക് ഗുരുതരമല്ലെന്ന് ഡോക്ടര്‍ അറിയിച്ചു.ഭർത്താവുമായി പിരിഞ്ഞുകഴിയുന്ന മൂന്നു കുട്ടികളുടെ അമ്മയായ രമ്യയും ഭാര്യയുമായി പിണങ്ങിക്കഴിയുന്ന രതീഷും മൂന്നാഴ്ച മുന്‍പാണ് ചെങ്ങോത്ത് വാടക വീടെടുത്ത് താമസം തുടങ്ങിയത്. രമ്യയും കുട്ടിയെ മര്‍ദ്ദിച്ചിരുന്നതായി അമ്മൂമ്മയുടെ മൊഴിയിലുണ്ട്. രതീഷ് സ്ഥലത്തില്ലാത്ത സമയത്ത്, മകള്‍ തന്നെ ഫോണ്‍ വിളിച്ച്‌ കുട്ടിയെ മര്‍ദിക്കുന്ന കാര്യം പറഞ്ഞതായി കുട്ടിയുടെ അമ്മൂമ്മ സുലോചന പറഞ്ഞു.രതീഷും രമ്യയും പ്രണയത്തിലായിരുന്നു. ഇരുവരും വിവാഹിതരാകാന്‍ തീരുമാനിച്ച ശേഷം വാടക വീട്ടിലേക്ക് മാറിയതോടെയാണ് പ്രശ്‌നങ്ങള്‍ ആരംഭിച്ചത്.നിസ്സാര കാര്യങ്ങള്‍ പറഞ്ഞ് രതീഷ്, കുട്ടിയെ ക്രൂരമായി മര്‍ദിച്ചതായും രമ്യ കൂട്ടുനിന്നതായും പോലീസ് പറഞ്ഞു. ബാലനീതി നിയമപ്രകാരമാണു കേസെടുത്തിരിക്കുന്നത്. ശരീരത്തില്‍ കാണുന്ന പരിക്കുകള്‍ക്ക് മൂന്ന് നാല് ദിവസത്തെ പഴക്കമുണ്ടെന്നാണ് പോലീസ് പറയുന്നത്. കേസില്‍ ബാലാവകാശ കമ്മിഷന്‍ ചെയര്‍മാന്‍ കെ.വി.മനോജ് കുമാര്‍ വിശദമായ അന്വേഷണം ആവശ്യപ്പെട്ടു.