കൊച്ചി: കലൂരിൽ മതിലിടിഞ്ഞ് വീണ് ഉണ്ടായ അപകടത്തിൽ ഇതര സംസ്ഥാന തൊഴിലാളി മരിച്ചു.രണ്ടു തൊഴിലാളികള്‍ക്ക് ഗുരുതരമായി പരിക്കേറ്റു.ആന്ധ്രാ സ്വദേശി ധന്‍പാലാണ് മരിച്ചത്. ഷേണായീസ് ജംങ്ഷന് സമീപം ക്രോസ് റോഡിലായിരുന്നു അപകടം. മൂന്ന് പേരാണ് അപകടത്തില്‍പ്പെട്ടത്. ഓട വൃത്തിയാക്കി കോണ്ക്രീറ്റ് ചെയ്യുന്ന പണിയിലേർപ്പെട്ട തൊഴിലാളികളാണ് അപകടത്തിൽപ്പെട്ടത്. കാലപ്പഴക്കം കാരണം മതിൽ ഇടിഞ്ഞു വീണതാണെന്നാണ് പ്രാഥമിക നിഗമനം. സമീപത്തെ മതില്‍ ഇവരുടെ മേല്‍ ഇടിഞ്ഞു വീഴുകയായിരുന്നു.അപകടം നടന്ന ഉടന്‍ നാട്ടുകാര്‍ രക്ഷാ പ്രവര്‍ത്തനം നടത്താന്‍ ശ്രമിച്ചുവെങ്കിലും കാര്യമായ ഫലമുണ്ടായില്ല.തുടര്‍ന്ന് ഫയര്‍ഫോഴ്‌സെത്തി നടത്തിയ ശ്രമത്തിനിടയില്‍ മതിലിനടിയില്‍ രണ്ടു പേരുടെ കാലുകള്‍ കണ്ടു.തുടര്‍ന്ന് ഇവരെ രണ്ടു പേരെയും ഫയര്‍ ഫോഴ്‌സ് ഒരു വിധത്തില്‍ രക്ഷിച്ചു പുറത്തെത്തിച്ചു.ഇതിനിടയിലാണ് മറ്റൊരാള്‍ കൂടി കുടുങ്ങിക്കിടക്കുന്നതായി ഫയര്‍ഫോഴ്‌സ് കണ്ടത്.തുടര്‍ന്ന് ഇദ്ദേഹത്തെയും പുറത്തെടുത്ത് ആശുപത്രിയില്‍ എത്തിച്ചുവെങ്കിലും ജീവന്‍ രക്ഷിക്കാന്‍ കഴിഞ്ഞില്ല.