ന്യൂഡല്‍ഹി: ഇന്ത്യയില്‍ കോവിഡ് ബാധിതരുടെ എണ്ണം 50 ലക്ഷം കടന്നു. 24 മണിക്കൂറിനിടെ 90,123 പേര്‍ക്ക് കൂടി കോവിഡ് ബാധിച്ചതോടെ രാജ്യത്തെ രോഗികളുടെ എണ്ണം 50,20,360 ആയി. ഒരാഴ്ചയായി പ്രതിദിനം ഒരുലക്ഷത്തോളം പേര്‍ക്കാണ് രോഗബാധ ഉണ്ടാകുന്നത്.24 മണിക്കൂറിനകം 1290 കോവിഡ് മരണവും റിപ്പോര്‍ട്ട് ചെയ്തു. ഇതോടെ കോവിഡ് മരണസംഖ്യ 82,066 ആയി. ഔദ്യോഗിക കണക്ക് പ്രകാരം മരണനിരക്ക് 1.63 ശതമാനമാണ്.അതേസമയം, രാജ്യത്ത് കോവിഡ് രോഗമുക്തി 78.53 ശതമാനമായി ഉയര്‍ന്നു. ഇതുവരെ 39.42 ലക്ഷം പേരാണ് രോഗമുക്തി നേടിയത്. നിലവില്‍ 9,95,933 രോഗികളാണ് ചികിത്സയിലുള്ളത്.കോവിഡ് അതിരൂക്ഷമായി ബാധിച്ച മഹാരാഷ്ട്രയില്‍ രോഗബാധിതരുടെ എണ്ണം 10.7 ലക്ഷമായി ഉയര്‍ന്നു. കഴിഞ്ഞ ദിവസം 17000ത്തിലധികം കേസുകളാണ് റിപ്പോര്‍ട്ട് ചെയ്തത്.