പത്തനംതിട്ട: തിരുവല്ലയിൽ കോവിഡ് നിരീക്ഷണത്തിൽ കഴിയവേ മരിച്ച ആള്‍ക്ക് കോവിഡില്ലെന്ന് സ്ഥിരീകരിച്ചു. നെടുമ്പ്രം സ്വദേശിയായ വിജയകുമാര്‍ വ്യാഴാഴ്ചയാണ് മരിച്ചത്. മാർച്ച് 23ന് അഹമ്മദാബാദിൽ നിന്ന് നാട്ടിലെത്തിയ ഇയാൾ വീട്ടിൽ നിരീക്ഷണത്തിൽ കഴിയുകയായിരുന്നു.വ്യാഴാഴ്ച വൈകിട്ട് 5 മണിയോടെ ശ്വാസതടസത്തെ തുടര്‍ന്ന് മുറിക്കുള്ളില്‍ കുഴഞ്ഞുവീണ വിജയകുമാറിനെ ബന്ധുക്കള്‍ ചേര്‍ന്ന് താലൂക്ക് ആശുപത്രിയില്‍ പ്രവേശിപ്പിച്ചുവെങ്കിലും അഞ്ചരയോടെമരണം സംഭവിക്കുകയായിരുന്നു. തുടര്‍ന്ന് കൊറോണ പരിശോധനയ്ക്കായി സ്രവം ശേഖരിച്ച ശേഷം ആറരയോടെമൃതദേഹം ജില്ലാ ആശുപത്രി മോര്‍ച്ചറിയിലേക്ക് മാറ്റി.കോവിഡില്ലെന്ന് പരിശോധനയില്‍ വ്യക്തമായി. ഹൃദയാഘാതമാണ് മരണ കാരണം. 62 വയസ്സായിരുന്നു.വിജയകുമാറിന് പ്രാഥമിക ചികിത്സ നല്‍കിയ താലൂക്ക് ആശുപത്രി അത്യാഹിത വിഭാഗത്തിലെ ഡോക്ടര്‍ അടക്കം ആറ് ജീവനക്കാരെയും ആശുപത്രിയില്‍ എത്തിച്ച നാല് ബന്ധുക്കളെയും നിരീക്ഷണ വലയത്തിലാക്കിയിരുന്നു. മൃതദേഹം ബന്ധുക്കള്‍ക്ക് വിട്ടുനല്‍കും.