കോഴിക്കോട്:നിപ്പ വൈറസിന് രണ്ടാം ഘട്ടത്തിൽ ശക്തി കുറയുമെന്നും അതിനാൽ മൂന്നാം ഘട്ടത്തിൽ വൈറസ് പടരാൻ സാധ്യതയില്ലെന്നും മണിപ്പാല്‍ വൈറോളജി ഇൻസ്റ്റിറ്റ്യൂട്ട് ഡയറക്ടര്‍ ഡോ.അരുണ്‍കുമാര്‍.വൈറസിന്റെ ഉറവിടത്തിൽ നിന്നും നേരിട്ട് രോഗബാധയേറ്റവരാണ് ആദ്യഘട്ടത്തില്‍ നിപ്പാ വൈറസ് മൂലം മരിച്ചത്. ഇവരില്‍ നിന്ന് രോഗം പകര്‍ന്നവരാണ് രണ്ടാംഘട്ടത്തില്‍ മരിച്ചത്. ഈ ഘട്ടത്തില്‍ രോഗബാധ നിയന്ത്രണവിധേയമാക്കാന്‍ കഴിഞ്ഞെന്നും അരുണ്‍ കുമാര്‍ പറഞ്ഞു.രണ്ടാം ഘട്ടത്തിൽ വൈറസ് ബാധയേറ്റവരെയെല്ലാം ഐസൊലേഷൻ വാർഡുകളിലാണ് പ്രവേശിപ്പിച്ചിരുന്നത്. അതിനാൽ രോഗം കടുത്തുനില്‍ക്കുന്ന സമയത്ത് രോഗിയുമായി മറ്റുളളവര്‍ക്ക് നേരിട്ട് ബന്ധപ്പെടാനുളള അവസരം കുറവായിരുന്നു.രോഗം മൂര്‍ഛിച്ചു നിൽക്കുമ്പോഴാണ് നിപ്പാ വൈറസ് രോഗിയിൽ നിന്നും മറ്റൊരാളിലേക്ക് പകരുന്നത്.അതുകൊണ്ട് രണ്ടാംഘട്ടത്തിലെ രോഗികളില്‍ നിന്ന് രോഗം പടരാനുളള സാധ്യത തീരെയില്ല. രണ്ടാംഘട്ടത്തില്‍ നിപ്പാ ബാധിച്ച എല്ലാവരെയും നിരീക്ഷണത്തില്‍ കൊണ്ടുവന്നതായി ഉറപ്പിച്ചാല്‍ ആശങ്കകള്‍ അവസാനിക്കുമെന്നും അരുണ്‍കുമാര്‍ പറഞ്ഞു.