കൊച്ചി: പ്രളയത്തെ തുടര്ന്ന് രണ്ടാഴ്ചയോളമായി അടച്ചിട്ടിരിക്കുന്ന കൊച്ചി അന്താരാഷ്ട്ര വിമാനത്താവളം തുറക്കുന്നത് വീണ്ടും നീട്ടി. വിമാനത്താവളം ഈ മാസം 26ന് തുറക്കുമെന്ന് നേരത്തെ അറിയിച്ചിരുന്നു. എന്നാല് 29ന് മാത്രമേ പ്രവര്ത്തനം ആരംഭിക്കാന് സാധിക്കുകയൊള്ളു എന്ന് സിയാല് അധികൃതര് അറിയിച്ചു. 29ന് ഉച്ചയ്ക്ക് രണ്ടുമണിയോടെ പ്രവര്ത്തനം തുടങ്ങുമെന്നാണ് അധികൃതര് അറിയിക്കുന്നത്. വെള്ളം കയറിയതിനെ തുടര്ന്ന് റണ്വേ അടക്കമുള്ള മേഖലകളിലുണ്ടായ നാശനഷ്ടമടക്കമുള്ള കാര്യങ്ങള് വിലയിരുത്താന് നടത്തിയ അവലോകന യോഗത്തിലാണ് വിമാനത്താവളം തുറക്കുന്നത് വീണ്ടും നീട്ടിയത്. പ്രളയക്കെടുതിയില് നിന്ന് മോചിതരായിട്ടില്ലാത്ത സാഹചര്യമായതിനാല് യാത്രക്കാര്ക്ക് അനുബന്ധ സേവനങ്ങള് നല്കുന്നതിലുള്ള ബുദ്ധിമുട്ടുകള് ചുണ്ടിക്കാട്ടിയാണ് പുതിയ തീരുമാനം.