ന്യൂഡല്‍ഹി:ഉന്നാവ് പെൺകുട്ടിയുടെ പിതാവിന്റെ കസ്റ്റഡി കൊലപാതകത്തില്‍ മുന്‍ ബിജെപി എം എല്‍ എ കുല്‍ദീപ് സെന്‍ഗറിന് 10 വര്‍ഷം തടവ്.സെന്‍ഗറിന്റെ സഹോദരന്‍ അടക്കം 7 പ്രതികള്‍ക്കും 10 വര്‍ഷം തടവ് ശിക്ഷ വിധിച്ചു.കേസില്‍ പ്രതികളായ 2 പോലീസുകാര്‍ക്കും കോടതി തടവ് വിധിച്ചു. ദില്ലി തീസ് ഹസാരി കോടതി ജഡ്ജ് ധര്‍മേഷ് ശര്‍മ്മയാണ് ശിക്ഷ വിധിച്ചത്പെൺകുട്ടിയെ ബലാത്സംഗം ചെയ്ത കേസില്‍ കുല്‍ദീപ് സെന്‍ഗറിന് കഴിഞ്ഞ ഡിസംബറില്‍ മരണം വരെ തടവ് വിധിച്ചിരുന്നു.2018 ഏപ്രില്‍ ഒൻപതിനാണ് ജുഡീഷ്യല്‍ കസ്റ്റഡിയില്‍ പെണ്‍കുട്ടിയുടെ പിതാവ് മരിച്ചത്. പിതാവിന്റെ മരണത്തില്‍ സെന്‍ഗാറിന് പങ്കുണ്ടെന്ന് പെണ്‍കുട്ടിയുടെ കുടുംബം ആരോപിച്ചിരുന്നു. പൊലീസ് അറസ്റ്റിന് മുൻപ് പെൺകുട്ടിയുടെ പിതാവിനെ സെന്‍ഗാറും അനുയായികളും ക്രൂരമായി മര്‍ദ്ദിച്ചെന്ന് ബന്ധുക്കള്‍ മൊഴി നല്‍കിയിരുന്നു.തുടര്‍ന്ന്, സെന്‍ഗര്‍, അദ്ദേഹത്തിന്‍റെ സഹോദരന്‍ ഇതുല്‍, ഭദൗരിയ, എസ്‌എ കാംട പ്രസാദ്, കോണ്‍സ്റ്റബിള്‍ അമീര്‍ ഖാര്‍ തുടങ്ങിയവ 11 പേര്‍ക്കെതിരെയാണ് കേസെടുത്തത്. പെണ്‍കുട്ടിയെ ബലാത്സംഗം ചെയ്ത കേസിലും കുല്‍ദീപ് സെന്‍ഗര്‍ ശിക്ഷ അനുഭവിക്കുകയാണ്. പെണ്‍കുട്ടിയും കുടുംബവും സഞ്ചരിച്ച കാര്‍ ട്രക്കുമായി കൂട്ടിയിടിച്ച കേസിലും സെന്‍ഗര്‍ പ്രതിയാണ്.