കണ്ണൂര്‍:വിദേശത്തുനിന്നും നാട്ടിലെത്തിയ യുവാവിന് മങ്കിപോക്‌സ് സ്ഥിരീകരിച്ച സാഹചര്യത്തിൽ കണ്ണൂരില്‍ ജാഗ്രത ശക്തമാക്കി ആരോഗ്യവകുപ്പ്.രോഗിയുടെ കുടുംബാംഗങ്ങളും ഒരു ടാക്‌സി ഡ്രൈവറും നിരീക്ഷണത്തിലാണ്. ചികിത്സയിലുള്ളയാള്‍ക്ക് കൂടുതല്‍ ആളുകളുമായി സമ്പർക്കമുണ്ടോയെന്ന് അറിയാനുള്ള നടപടികള്‍ ഊര്‍ജിതമാക്കിയതായി ജില്ലാ മെഡിക്കൽ ഓഫിസര്‍ ഡോ. നാരായണ്‍ നായ്ക്ക് അറിയിച്ചു. സമ്പർക്കത്തിലുള്ളവര്‍ക്ക് എന്തെങ്കിലും ലക്ഷണങ്ങള്‍ ഉണ്ടോയെന്ന കാര്യവും നിരീക്ഷിച്ച്‌ വരികയാണ്. രോഗിയുടെ ആരോഗ്യനില തൃപ്തികരമാണെന്ന് പരിയാരം മെഡിക്കൽ കോളജ് സൂപ്രണ്ട് ഡോ. കെ സുദീപ് അറിയിച്ചു.
ജൂലായ് 13 ന് ഉച്ചയ്ക്ക് ദുബൈയില്‍ നിന്ന് മംഗളൂരുവിൽ വിമാനമിറങ്ങിയ യുവാവിന് നേരിയ പനിയും അസ്വസ്ഥത ഉണ്ടായതിനെ തുടര്‍ന്ന് ടാക്‌സിയിലാണ് പയ്യന്നൂരിലെ വീട്ടിലേക്ക് എത്തിയത്. ത്വക്കില്‍ പോളകള്‍ കണ്ടതിനെ തുടര്‍ന്ന് ജൂലായ് 14 ന് രാവിലെ സ്വന്തം ബൈകില്‍ പയ്യന്നൂരെ ചര്‍മരോഗ വിദഗ്ധനെ കണ്ടു. പിന്നാലെ രോഗം സംശയിക്കുന്നുണ്ടെന്ന് ആരോഗ്യ വകുപ്പ് അധികൃതരെ അറിയിച്ചു.തുടര്‍ന്ന് മെഡിക്കൽ കോളജ് ആശുപത്രിയിലെ ഐസൊലേഷന്‍ വാര്‍ഡില്‍ നിരീക്ഷണത്തില്‍ പ്രവേശിപ്പിച്ചു. രോഗം സ്ഥിരീകരിച്ചതോടെ യുവാവിന്റെ ഭാര്യ, രണ്ട് മക്കള്‍, അമ്മ, ടാക്‌സി ഡ്രൈവര്‍ എന്നിവര്‍ ഇപ്പോള്‍ നിരീക്ഷണത്തിലാണ്.ഇയാള്‍ സഞ്ചരിച്ച വിമാനത്തില്‍ 12 കണ്ണൂര്‍ സ്വദേശികളും കാസര്‍കോട് സ്വദേശികളുമുണ്ടായിരുന്നു. ഇവര്‍ക്ക് യുവാവുമായി സമ്പർക്കമില്ലെന്നാണ് വിവരമെന്ന് ആരോഗ്യ വകുപ്പ് അധികൃതര്‍ അറിയിച്ചു.