കണ്ണൂര്‍: ജില്ലയിലെ വിവിധ എടിഎം കൗണ്ടറുകളില്‍ നിന്നായി വ്യാജ എടിഎം കാര്‍ഡുകള്‍ ഉപയോഗിച്ച്‌ പണം തട്ടിയെടുത്ത കേസിലെ പ്രതികളെ സൈബര്‍ ക്രൈം പൊലീസ് ചോദ്യം ചെയ്തു.കാസര്‍കോട് തളങ്കരയിലെ മിസ്സുയ ഹൗസില്‍ അബ്ദുള്‍ സമദാനി (32) കാസര്‍കോട് പാറക്കട്ടയിലെ നൗഫീറ മന്‍സിലില്‍ മുഹമ്മെദ് നജീബ് ( 28) പാറക്കട്ട, ക്രോസ്സ് റോഡ്, പാറക്കട്ടയിലെ രാംദാസ് നഗറിലെ നൗഫീറ മന്‍സിലില്‍ മുഹമ്മെദ് നുമാന്‍, (37) എന്നിവരെയാണ് കോടതിയില്‍ നിന്നും പൊലീസ് കസ്റ്റഡിയില്‍ വാങ്ങിയത്.കേരള ബാങ്കിന്റെ മാങ്ങാട്ടുപറമ്പിലേയും പിലാത്തറയിലെയും എടിഎം കൗണ്ടറുകളില്‍ നിന്നും 40,000 ത്തോളം രൂപയാണ് പ്രതികള്‍ വ്യാജ എടിഎം കാര്‍ഡ് ഉപയോഗിച്ച്‌ പിന്‍വലിച്ചത്. സ്‌കിമ്മര്‍ പോലുള്ള ഉപകരണങ്ങള്‍ എടിഎം കൗണ്ടറുകളില്‍ സ്ഥാപിച്ച്‌ ഉടമകളുടെ കാര്‍ഡ് വിവരങ്ങള്‍ ചോര്‍ത്തിയെടുത്ത് വ്യാജ എടിഎം കാര്‍ഡുകള്‍ നിര്‍മ്മിച്ച്‌ പണം തട്ടിയെടുക്കുന്നതാണ് ഇവരുടെ രീതി. കണ്ണൂര്‍ ജില്ലയില്‍ നാല് എ ടി എം കൗണ്ടറുകളില്‍ നിന്നുമാണ് പ്രതികള്‍ പണം പിന്‍വലിച്ചതെന്ന് അന്വേഷണത്തില്‍ കണ്ടെത്തിയിട്ടുണ്ട്.പ്രതികള്‍ക്കെതിരെ സമാനമായ കേസുകൾ കേരളത്തില്‍ മറ്റ് ജില്ലകളിലും രജിസ്റ്റര്‍ ചെയ്തിട്ടുണ്ട്. സൈബര്‍ ക്രൈം പൊലീസ് സ്റ്റേഷന്‍ ഇന്‍സ്‌പെക്ടര്‍ പി കെ മണി , സബ്ബ് ഇന്‍സ്‌പെക്ടര്‍ ഹരിദാസന്‍, എ എസ് ഐ പ്രദീപന്‍ എന്നിവരാണ് കണ്ണൂര്‍ ജില്ലയില്‍ നടന്ന എ ടി എം തട്ടിപ്പുകളുടെ അന്വേഷണം നടത്തുന്നത്.