പത്തനംതിട്ട: ജെസ്ന തിരോധാനം നിര്‍ണായക വഴിത്തിരിവിലേക്കെന്ന് അന്വേഷണ സംഘം. 10 ദിവസത്തിനുള്ളില്‍ ജെസ്‌നയെ കണ്ടെത്താനാകുമെന്ന പ്രതീക്ഷയുണ്ടെന്നാണ് റിപ്പോര്‍ട്ടുകള്‍ സൂചിപ്പിക്കുന്നത്.ജെസ്നയ്ക്ക് മറ്റൊരു ഫോണ്‍ കൂടി ഉണ്ടായിരുന്നതായി പോലീസിന് സൂചന ലഭിച്ചു. വീട്ടുകാരും സുഹൃത്തുക്കളും അറിയാതെ മറ്റൊരു സ്മാര്‍ട്ട് ഫോണ്‍ ജസ്‌നയുടെ കൈവശമുണ്ടായിരുന്നതായിട്ടാണ് അന്വേഷണത്തില്‍ തെളിയുന്നത്.കേസ് അധികം വൈകാതെ അവസാനിപ്പിക്കാന്‍ സാധിക്കുമെന്ന വിശ്വാസത്തിലാണ് പോലീസ്. നിര്‍ണായക വിവരങ്ങളാണ് പോലീസിന് ഇപ്പോൾ ലഭിച്ചിരിക്കുന്നത്.കൊല്ലമുള സന്തോഷ് കവല കുന്നത്തുവീട്ടില്‍ ജയിംസിന്റെ മകള്‍ ജെസ്ന മരിയ ജെയിംസിനെ മാര്‍ച്ച്‌ 22-നാണു കാണാതായത്. ഐ.ജി. മനോജ് ഏബ്രഹാമിന്റെ നേതൃത്വത്തിലുള്ള 15 അംഗ സംഘത്തിനാണ് അന്വേഷണച്ചുമതല. ജെസ്നയെക്കുറിച്ച്‌ വിവരങ്ങള്‍ നല്‍കുന്നവര്‍ക്ക് അഞ്ചുലക്ഷം രൂപ പാരിതോഷികവും പ്രഖ്യാപിച്ചിട്ടുണ്ട്. 30-ലധികം മൊബൈല്‍ ടവറുകളില്‍നിന്നു ലഭിച്ച ടെലിഫോണ്‍ കോളുകള്‍ പോലീസ് പരിശോധിച്ചുവരികയാണ്.സംശയമുള്ള ഇരുനൂറോളം നമ്പറുകൾ പ്രത്യേകം നിരീക്ഷിക്കുന്നുണ്ട്. ഇതിലോരോരുത്തരെയും നേരിട്ടുകണ്ട് അന്വേഷണം നടത്തിവരികയാണ്.ഇവയിലേതെങ്കിലും നമ്പർ ജെസ്ന ഉപയോഗിച്ചിരുന്നോ എന്നു കണ്ടെത്താനാണ് പോലീസ്ശ്രമം. ഏതാനും ദിവസങ്ങള്‍ക്കുള്ളില്‍ ഇതിലെ അന്വേഷണം പൂര്‍ത്തിയാവും.