കൊച്ചി:കൊച്ചിയിൽ നിന്ന് കാണാതായ സർക്കിൾ ഇൻസ്പെക്ടർ വി.എസ് നവാസിനെ കണ്ടെത്തി.ഇന്ന് പുലർച്ചെ നാലുമണിയോട് കൂടി കോയമ്പത്തൂരിന് സമീപം കരൂരിൽ ട്രെയിനിൽ യാത്ര ചെയ്യുമ്പോഴാണ് റെയിൽവേ പോലീസ് നവാസിനെ കണ്ടെത്തിയത്.തുടര്‍ന്ന് ഉദ്യോഗസ്ഥര്‍ കേരള പൊലീസിനെ വിവരം അറിയിക്കുകയായിരുന്നു.പാലക്കാട് നിന്നും കേരള പൊലീസിന്റെ ഒരു സംഘം തമിഴ്നാട്ടിലേക്ക് പുറപ്പെട്ടിട്ടുണ്ട്. ഉച്ചയോടെ നവാസിനെ കൊച്ചിയിൽ എത്തിക്കും.തുടർന്ന് നവാസിനെ കോടതിയിൽ ഹാജരാക്കും.കഴിഞ്ഞ വ്യാഴാഴ്ചയാണ് കൊച്ചി സെന്‍ട്രല്‍ സ്റ്റേഷനിലെ സര്‍ക്കിള്‍ ഇന്‍സ്‌പെക്ടറായ നവാസിനെ കാണാനില്ലെന്ന വാര്‍ത്ത പുറംലോകമറിഞ്ഞത്. നവാസിനെ കാണാനില്ലെന്ന് ഭാര്യയാണ് പരാതി നല്‍കിയത്. തുടര്‍ന്ന് പൊലീസ് നാലു സംഘങ്ങളായി തിരിഞ്ഞ് അന്വേഷിക്കുകയായിരുന്നു.മേലുദ്യോഗസ്ഥന്റെ മാനസിക പീഡനത്തില്‍ മനം മടുത്താണ് നവാസ് നാട് വിട്ടതെന്ന് അദ്ദേഹത്തിന്റെ ഭാര്യ മുഖ്യമന്ത്രിക്ക് പരാതിയും നല്‍കിയിരുന്നു. ഇതേ തുടര്‍ന്ന് അന്വേഷണം ഊര്‍ജ്ജിതമാക്കാന്‍ മുഖ്യമന്ത്രി നിര്‍ദ്ദേശിക്കുകയായിരുന്നു.