തിരുവനന്തപുരം:പരിപാടിക്ക് വൈകിയെത്തിയതിന്റെ പേരില്‍ മിമിക്രി താരം അസീസ് നെടുമങ്ങാടിനു നേരെ സംഘാടകരുടെ മര്‍ദ്ദനം. ആക്രമണത്തില്‍ ചെവിയുടെ കര്‍ണപടം തകര്‍ന്ന അസീസിനെ ആശുപത്രിയില്‍ പ്രവേശിപ്പിച്ചു. വെള്ളാറട ധര്‍മ്മശാസ്ത്ര ക്ഷേത്രത്തില്‍ പരിപാടിക്കെത്താന്‍ ഒന്നര മണിക്കൂര്‍ വൈകിയതിനാണ് സംഘാടകരില്‍ ഒരു വിഭാഗം അസീസിനെ തല്ലിച്ചതച്ചത്. അസീസിന് മര്‍ദ്ദനമേറ്റ സംഭവത്തില്‍ ശക്തമായ പ്രതിഷേധം രേഖപ്പെടുത്തി സിനിമാ- സീരിയല്‍-മിമിക്രി രംഗത്തെ നിരവധി താരങ്ങള്‍ രംഗത്തെത്തിയിട്ടുണ്ട്.
മര്‍ദ്ദനത്തില്‍ അസീസിന്റെ കര്‍ണപടം തകര്‍ന്നു. കൈയ്ക്കും പരുക്കേറ്റിട്ടുണ്ട്. അടിയേറ്റതിനു ശേഷം നിര്‍ബന്ധപൂര്‍വ്വം പരിപാടി അവതരിപ്പിച്ചതിനു ശേഷം മാത്രമാണ് അസീസിനേയും സംഘത്തേയും വിട്ടയച്ചത്. എന്നാല്‍ പറഞ്ഞുറപ്പിച്ച തുക നല്‍കിയതുമില്ല. അസീസിന്റെ പരാതിയില്‍ വെള്ളാറട പൊലീസ് കേസ് രജിസ്റ്റര്‍ ചെയ്ത് അന്വേഷണം ആരംഭിച്ചെങ്കിലും ഇതുവരെ ആരുടേയും അറസ്റ്റ് രേഖപ്പെടുത്തിയിട്ടില്ല.