തിരുവനന്തപുരം: സംസ്ഥാനത്തെ ബിജെപിയെ പിടിച്ചുലച്ച മെഡിക്കൽ കോഴ ആരോപണവുമായി ബന്ധപ്പെട്ട് ഡൽഹിയിലെ വിവാദ ഇടനിലക്കാരൻ സതീഷ് നായർ വിജിലൻസ് അന്വേഷണ സംഘത്തിന് മുന്നിൽ ഹാജരായി. ഇയാളെ അന്വേഷണ ഉദ്യോഗസ്ഥനായ എസ്പി ജയകുമാർ ചോദ്യം ചെയ്യുകയാണ്. കേസുമായി ബന്ധപ്പെട്ട് ഇന്ന് ഹാജരാകണമെന്ന് കാട്ടി സതീഷ് നായർക്ക് വിജിലൻസ് നോട്ടീസ് നൽകിയിരുന്നു.കഴിഞ്ഞ ദിവസം ബിജെപി സംസ്ഥാന അധ്യക്ഷൻ കുമ്മനം രാജശേഖരനും ആരോപണത്തെക്കുറിച്ച് പാര്‍ട്ടിതല അന്വേഷണം നടത്തിയ ബിജെപി നേതാക്കളായ കെ.പി.ശ്രീശനും എ.കെ.നസീറും വിജിലന്‍സിന് മൊഴിനൽകിയിരുന്നു.മെഡിക്കൽ കോളജ് അനുമതിക്കായി വർക്കല എസ്ആർ മെഡിക്കൽ കോളജ് ഉടമ ആർ.ഷാജി ബിജെപി നേതാക്കൾ വഴി 5.65 കോടി രൂപ കൈമാറിയെന്നാണ് കേസ്.