കൊച്ചി: മരടിലെ ഫ്ലാറ്റ് പൊളിക്കുന്നതുമായി ബന്ധപ്പെട്ട് നിലപാട് കടുപ്പിച്ച്‌ മരട് നഗരസഭ. ഫ്ലാറ്റുടമകള്‍ക്ക് ഒഴിയാനുള്ള സമയം നീട്ടി നല്‍കില്ലെന്ന് നഗരസഭ അധികൃതര്‍ അറിയിച്ചു. നേരത്തെ വിച്ഛേദിച്ചെങ്കിലും പിന്നീട് പുനഃസ്ഥാപിച്ച വൈദ്യുതി, വെള്ളം കണക്ഷനുകള്‍ വ്യാഴാഴ്ച വൈകുന്നേരത്തോടെ വിച്ഛേദിക്കുമെന്നും നഗരസഭ സെക്രട്ടറി ആരിഫ് ഖാന്‍ വ്യക്തമാക്കി.സാധനങ്ങളെല്ലാം പായ്ക്ക് ചെയ്ത് മറ്റൊരിടത്തേക്ക് മാറുന്നതിന് 48 മണിക്കൂര്‍ എങ്ങനെ പര്യാപ്തമാവുമെന്നാണ് ഫ്ലാറ്റുടമകള്‍ ചോദിക്കുന്നത്. ഫ്ലാറ്റ് ഒഴിയാന്‍ ഒരാഴ്ച കൂടി സമയം അനുവദിക്കണമെന്നാണ് ഫ്ലാറ്റുടമകള്‍ ആവശ്യപ്പെട്ടത്. രണ്ട് ദിവസം കൊണ്ട് ഒഴിയുന്നത് പ്രായോഗികമല്ലെന്നും ഇവര്‍ പറയുന്നു.മരടിലെ ഫ്ലാറ്റില്‍ നിന്ന് ഒഴിയുന്നവര്‍ക്ക് താമസിക്കാനായി സര്‍ക്കാര്‍ നല്‍കിയ അപ്പാര്‍ട്ടുമെന്‍റുകളില്‍ ഒഴിവില്ലെന്ന പരാതിയും ഉയര്‍ന്നിട്ടുണ്ട്.