വയനാട് : വയനാട് മേപ്പടിയില്‍ പ്രളയത്തില്‍ വീട് നഷ്ടപെട്ട യുവാവിനെ തൂങ്ങി മരിച്ച നിലയില്‍ കണ്ടെത്തി. മേപ്പാടി സ്വദേശി സനിലിനെയാണ് ഷെഡ്ഡില്‍ തൂങ്ങിമരിച്ച നിലയില്‍ കണ്ടെത്തിയത്. 2019 ഓഗസ്റ്റിലെ പ്രളയത്തിലാണ് സനിലിന് വീട് നഷ്ടപെട്ടത്.പ്രളയ സാമ്പത്തിക സഹായം ഇദ്ദേഹത്തിന് ലഭിച്ചിട്ടില്ലെന്നാണ് സൂചന. സനലിന്റെ വീട് പുറം പോക്ക് ഭൂമിയിലായിരുന്നു. അതിനാല്‍ തന്നെ രേഖകളൊന്നും കൈവശം ഉണ്ടായിരുന്നില്ല. ലൈഫ് പോലുള്ള പദ്ധതികള്‍ നടപ്പിലാക്കി തുടങ്ങിയപ്പോള്‍ രേഖകള്‍ ഉള്ളവര്‍ക്കാണ് ആദ്യ ഘട്ടത്തില്‍ വീട് ലഭിച്ചിരുന്നത്.സാങ്കേതിക പ്രശ്‌നങ്ങളില്‍ കുരുങ്ങിയത് മൂലമാണ് സനലിന് വീട് നല്‍കാതിരുന്നതെന്നാണ് മേപ്പാടി പഞ്ചായത്ത് നല്‍കുന്ന വിശദീകരണം.