വടകര: ടിപി ചന്ദ്രശേഖരന്‍ കൊലക്കേസിലെ പ്രധാന പ്രതികളിലൊരാളായ കിര്‍മാണി മനോജ് വിവാഹം ചെയ്തത് തന്റെ ഭാര്യയെയാണെന്ന പരാതിയുമായി യുവാവ് രംഗത്ത്. വടകര നാരായണ നഗര്‍ സ്വദേശിയാണ് വടകര പോലീസില്‍ പരാതി നല്‍കിയത്. തന്റെ ഭാര്യ പുതിയ ഭര്‍ത്താവിനൊപ്പം ജീവിക്കുന്നത് തന്റെ രണ്ട് മക്കളെയും കൂട്ടിയാണ്. എന്നാല്‍ തനിക്ക് മക്കളെ വിട്ടുകിട്ടണമെന്നും വിദേശത്ത് ജോലി ചെയ്യുന്ന ഇയാള്‍ പരാതിയില്‍ ആവശ്യപ്പെട്ടു.ഇയാളുടെ ഭാര്യ മനോജിനെ വിവാഹം ചെയ്തത് വിവാഹബന്ധം വേര്‍പ്പിരിയാതെ ആണെന്നും യുവാവ് പറഞ്ഞു. യുവാവിന്റെ പരാതിയെത്തുടര്‍ന്ന് പോലീസ് യുവതിയെയും മക്കളെയും വടകര സ്റ്റേഷനില്‍ വിളിച്ചുവരുത്തി. അല്‍പ്പനേരം പരാതിക്കാരന്‍ മക്കളുമായി സംസാരിച്ചു. ശേഷം യുവതിയും മക്കളും തിരിച്ചുപോയി. വിദേശത്തുനിന്ന് എത്തുന്നതിനു മുൻപേ യുവതി മക്കളേയുംകൂട്ടി അവരുടെ വീട്ടിലേക്ക് പോയിരുന്നെന്നും, കല്യാണം കഴിഞ്ഞതായി പത്രവാര്‍ത്ത കണ്ടാണ് അറിഞ്ഞതെന്നും പോലീസിന് നല്‍കിയ പരാതിയില്‍ യുവാവ് പറഞ്ഞു. നിലവില്‍ തന്റെ ഭാര്യയായതിനാല്‍ ഇക്കാര്യത്തില്‍ നിയമപരമായ നടപടി സ്വീകരിക്കണമെന്നും പരാതിയില്‍ പറയുന്നു.ടിപി വധക്കേസില്‍ ശിക്ഷിക്കപ്പെട്ട് ജയിലില്‍ കഴിയുന്ന കിര്‍മാണി മനോജ് പരോളില്‍ ഇറങ്ങിയശേഷം ബുധനാഴ്ചയാണ് വിവാഹിതനായത്.