മാഹി:മാഹി സെന്റ് തെരേസാസ് പള്ളിയിലെ 18 ദിവസം നീണ്ടുനിൽക്കുന്ന തിരുനാളിന് ഇന്ന് കൊടിയേറും.രാവിലെ 11.30 ന് ഇടവക വികാരി ഫാദർ ഡോ.ജെറോം ചിങ്ങാന്തറ പള്ളിയങ്കണത്തിൽ തിരുനാൾ പതാക ഉയർത്തും.പിന്നീട് അൾത്താരയിലെ രഹസ്യ അറയിൽ സൂക്ഷിച്ചിരിക്കുന്ന അമ്മ ത്രേസ്സ്യയുടെ തിരുസ്വരൂപം പൊതുവണക്കത്തിനായി ദേവാലയത്തിനകത്ത് പ്രത്യേകം തയ്യാറാക്കിയ പീഠത്തിൽ പ്രതിഷ്ഠിക്കും.14,15 തീയതികളിലാണ് തിരുനാളിന്റെ പ്രധാന പരിപാടികൾ നടക്കുക.14 ന് കണ്ണൂർ രൂപത മെത്രാൻ ഡോ.അലക്സ് വടക്കുംതലയെ സ്വീകരിച്ച് ദേവാലയത്തിന് അകത്തേക്ക് ആനയിക്കും.തുടർന്ന് അദ്ദേഹത്തിന്റെ കാർമികത്വത്തിൽ ദിവ്യബലി നടക്കും. ഏഴുമണിക്ക് അമ്മ ത്രേസ്സ്യായുടെ തിരുസ്വരൂപം വഹിച്ചുകൊണ്ടുള്ള നഗരപ്രദക്ഷിണവും നടക്കും.15 ന് പുലർച്ചെ രണ്ടുമണി മുതൽ ഏഴുമണിവരെ ദേവാലയത്തിനു മുന്നിൽ ശയനപ്രദക്ഷിണവും നടക്കും.പള്ളി പരിസരത്ത് പ്ലാസ്റ്റിക്ക് നിരോധിച്ചിട്ടുണ്ടെന്നും വാഹന പാർക്കിങ് സൗകര്യം കോളേജ് ഗ്രൗണ്ടിൽ ഒരുക്കിയിട്ടുണ്ടെന്നും ആഘോഷകമ്മിറ്റി അറിയിച്ചു.14,15 തീയതികളിൽ പ്രത്യേക ട്രെയിൻ സർവീസും ഉണ്ടാകും.