ന്യൂഡൽഹി:ബി.ജെ.പിയെ സര്‍ക്കാരുണ്ടാക്കാന്‍ ക്ഷണിച്ച മഹാരാഷ്ട്ര ഗവര്‍ണറുടെ നടപടി ഭരണഘടനവിരുദ്ധമാണെന്ന് കാണിച്ചുള്ള ഹരജിയിൽ സുപ്രിം കോടതിയിൽ വാദം തുടങ്ങി. പാതിരാ അട്ടിമറിയിലൂടെ ബി.ജെ.പി നേതൃത്വത്തിലുള്ള സര്‍ക്കാര്‍ അധികാരമേറ്റതിനെതിരെ എന്‍.സി.പി-കോണ്‍ഗ്രസ്-ശിവസേന കക്ഷികളാണ് ഹർജി സമർപ്പിച്ചത്.എന്‍.വി രമണ അധ്യക്ഷനായ മൂന്നംഗ ബെഞ്ചാണ് ഹർജിയിൽ വിധിപറയുക. അവധിദിനമായ ഇന്നലെ ഹരജി പരിഗണിച്ച കോടതി സര്‍ക്കാറുണ്ടാക്കാന്‍ മുഖ്യമന്ത്രി ദേേവന്ദ്ര ഫഡ്നാവിസ് ഗവര്‍ണര്‍ ഭഗത്സിങ് കോശിയാരിക്ക് സമര്‍പ്പിച്ച കത്തുകള്‍ തിങ്കളാഴ്ച രാവിലെ ഹാജരാക്കാനാണ് നിര്‍ദേശിച്ചിരുന്നത്.എത്രയും വേഗം വിശ്വാസവോട്ടെടുപ്പ് വേണമെന്ന പ്രതിപക്ഷ കക്ഷികളുടെ ആവശ്യം കോടതി പരിഗണിക്കുമോയെന്ന കാര്യം ഇന്നറിയാം.ഫഡ്നാവിസിനെ സര്‍ക്കാറുണ്ടാക്കാന്‍ ക്ഷണിച്ച ഗവര്‍ണറുടെ നടപടി ഭരണഘടന വിരുദ്ധമെന്ന് പ്രഖ്യാപിക്കുക, തങ്ങളുടെ സഖ്യത്തെ സര്‍ക്കാര്‍ രൂപവത്കരണത്തിന് ക്ഷണിക്കാന്‍ ഗവര്‍ണര്‍ക്ക് നിര്‍ദേശം നല്‍കുക എന്നിവയായിരുന്നു ശിവസേന-എന്‍.സി.പി-കോണ്‍ഗ്രസ് സംയുക്ത ഹരജിയിലെ ആവശ്യങ്ങള്‍.നിയമസഭയില്‍ ഭൂരിപക്ഷം തെളിയിക്കാന്‍ ഫഡ്നാവിസ് സര്‍ക്കാറിന് നിര്‍ദേശം നല്‍കണമെന്ന ശിവേസനയുടെയും എന്‍.സി.പിയുടെയും കോണ്‍ഗ്രസിെന്‍റയും ആവശ്യത്തില്‍ തീരുമാനമെടുക്കാതിരുന്ന ബെഞ്ച്, അതിനു മുൻപ് ഗവര്‍ണര്‍ക്ക് സമര്‍പ്പിച്ച രേഖകളും തെളിവുകളും പരിശോധിക്കണമെന്നാണ് വ്യക്തമാക്കിയത്.