കാസർകോഡ്:പ്രണയാഭ്യർത്ഥന നിരസിച്ച മലയാളി വിദ്യാർത്ഥിനിയെ സഹപാഠി കുത്തിക്കൊന്നു. സംഭവത്തിന് ശേഷം ആത്മഹത്യയ്ക്ക് ശ്രമിച്ച സഹപാഠി നെല്ലൂർ കെമ്രാജെ ഗ്രാമം നാർണകജെയിലെ എസ്.കാർത്തികിനെ നാട്ടുകാർ പിടികൂടി പോലീസിലേൽപ്പിച്ചു. സുള്ള്യ നെഹ്‌റു മെമ്മോറിയൽ കോളേജിലെ രണ്ടാം വർഷ ബിഎസ്‌സി വിദ്യാർത്ഥിനി കാസർകോഡ് മുള്ളേരിയ കാറഡുക്ക ശാന്തി നഗറിലെ കരണി രാധാകൃഷ്ണ ഭട്ടിന്റെയും ദേവകിയുടെയും മകൾ കെ.അക്ഷതയാണ്(19) കൊല്ലപ്പെട്ടത്. ഇന്നലെ വൈകുന്നേരം നാലുമണിക്ക് സുള്ള്യ ടൗണിലായിരുന്നു സംഭവം.ക്‌ളാസ് കഴിഞ്ഞ് ബസ് കയറാനായി കോളേജ് റോഡിലൂടെ പ്രധാന റോഡിലേക്ക് നടന്നുവരികയായിരുന്ന അക്ഷതയെ പിറകിൽ ബൈക്കിൽ വന്ന കാർത്തിക് കുത്തുകയായിരുന്നു.ഏഴു പ്രാവശ്യം അക്ഷതയെ കുത്തിയ കാർത്തിക് സ്വയം കൈത്തണ്ട മുറിച്ച ആത്മഹത്യക്ക് ശ്രമിച്ചു.കണ്ടുനിൽക്കുകയായിരുന്ന നാട്ടുകാർ ഇയാളെ തടഞ്ഞ് പോലീസിലേൽപ്പിച്ചു. ഗുരുതരമായി പരിക്കേറ്റ അക്ഷതയെ ആദ്യം സുള്ള്യ കെ.വി.ജി ആശുപത്രിയിൽ പ്രവേശിപ്പിച്ചു.പരിക്ക് ഗുരുതരമായതിനാൽ മംഗളൂരു ആശുപത്രിയിലേക്ക് കൊണ്ടുപോകും വഴി മരണം സംഭവിക്കുകയായിരുന്നു.അക്ഷതയെ കാർത്തിക് നിരന്തരം ഫോൺ ചെയ്‌തും മെസ്സേജ് അയച്ചും ശല്യം ചെയ്യാറുണ്ടായിരുന്നു.ശല്യം തുടർന്നാൽ പ്രിൻസിപ്പലിന് പരാതി നൽകുമെന്ന് അക്ഷത പറയുകയൂം ചെയ്തു.ഇതിൽ പ്രകോപിതനായാണ് കാർത്തിക് കൊലനടത്തിയതെന്ന് പോലീസ് പറഞ്ഞു. കൈക്ക് പരിക്കേറ്റ കാർത്തിക്കിന് ചികിത്സ നൽകിയ ശേഷം പോലീസ് കസ്റ്റഡിയിൽ എടുത്തു.