തിരുവനന്തപുരം: ബസ് യാത്രാ നിരക്ക് വര്‍ധിപ്പിക്കാന്‍ സര്‍ക്കാരിന് അനുമതി നൽകി എല്‍ഡിഎഫ് നേതൃയോഗം.വര്‍ധനയുടെ വിശദാംശങ്ങള്‍ തീരുമാനിക്കാന്‍ മുഖ്യമന്ത്രി പിണറായി വിജയനെയും ഗതാഗത മന്ത്രി ആന്റണി രാജുവിനെയും ചുമതലപ്പെടുത്തി.സ്വകാര്യ ബസുകള്‍ക്കൊപ്പം കെഎസ്‌ആര്‍ടിസിയിലും നിരക്ക് ഉയരും.ജനങ്ങളെ വല്ലാതെ ബാധിക്കാത്ത തീരുമാനം കൈക്കൊള്ളാനാണു നിര്‍ദേശം. മിനിമം നിരക്ക് 10 രൂപയായി വര്‍ധിപ്പിക്കാനാണു ഗതാഗത വകുപ്പ് തത്വത്തില്‍ തീരുമാനിച്ചിരിക്കുന്നത്. വിദ്യാര്‍ഥികളുടെ നിരക്കു കൂട്ടുന്നതിനെ എല്‍ഡിഎഫ് അനുകൂലിച്ചില്ലെങ്കിലും നേരിയ വര്‍ധനയുണ്ടാകും.അവസാനമായി നിരക്ക് വര്‍ധിപ്പിച്ചത് 2020 ജൂലൈ 3നാണ്. അന്ന് മിനിമം നിരക്ക് 8 രൂപയായി നിലനിര്‍ത്തിയെങ്കിലും സഞ്ചരിക്കാവുന്ന ദൂരം 5 കിലോമീറ്ററില്‍ നിന്നു രണ്ടര കിലോമീറ്ററായി കുറച്ചു. അതു കഴിഞ്ഞുള്ള ഓരോ കിലോമീറ്ററിനും 70 പൈസ എന്ന നിരക്ക് 90 പൈസയാക്കി. കോവിഡ് കണക്കിലെടുത്തുള്ള ഈ താല്‍ക്കാലിക വര്‍ധന അതേപടി നിലനിര്‍ത്തിയാകും വീണ്ടും നിരക്ക് വര്‍ധിപ്പിക്കുക. 2020 ജൂണില്‍ നല്‍കിയ റിപ്പോര്‍ട്ട് അനുസരിച്ചാണ് മിനിമം നിരക്ക് 8 രൂപയില്‍ നിന്ന് 10 ആക്കുന്നത്. മിനിമം നിരക്കില്‍ 5 രൂപയോ അല്ലെങ്കില്‍ ടിക്കറ്റിന്റെ 50 ശതമാനമോ കൂട്ടാം എന്നും ശുപാര്‍ശയുണ്ടെങ്കിലും വന്‍ പ്രതിഷേധത്തിനു സാധ്യതയുള്ളതിനാല്‍ ഇത് സ്വീകരിക്കില്ല.