മട്ടന്നൂർ:മട്ടന്നൂരിൽ കെ.എസ്.ആർ.ടി.സി ഡ്രൈവർക്ക് മർദനമേറ്റു.ബസ് തടഞ്ഞ് ഒരു സംഘം ഡ്രൈവറെ മർദിച്ച ശേഷം ബസിനു കേടുവരുത്തുകയായിരുന്നു. കഴിഞ്ഞദിവസം രാത്രി ഉളിയിൽ നരയമ്പാറയിലായിരുന്നു സംഭവം. കണ്ണൂരിൽ നിന്നും ഇരിട്ടിയിലേക്കു പോകുകയായിരുന്ന ബസിനു നേരെയാണ് അക്രമം നടന്നത്.ബസ് നരായമ്പാറയിൽ എത്തിയപ്പോൾ ഒരു സംഘം ഓട്ടോറിക്ഷ ബസിനു കുറുകെയിട്ടു തടയുകയും ഡ്രൈവറെ അസഭ്യം പറഞ്ഞു കൊണ്ടു മർദിക്കുകയുമായിരുന്നു. പരിക്കേറ്റ ബസ് ഡ്രൈവർ ഏച്ചൂരിലെ കെ. രജീഷ് (40)ജില്ലാ ആശുപത്രിയിൽ ചികിത്സ തേടി. ബസിന്റെ റിയർ വ്യൂ മിറർ അക്രമിസംഘം അടിച്ചു തകർത്തു. രജീഷിന്‍റെ പരാതിയിൽ മട്ടന്നൂർ പോലീസ് കേസെടുത്ത് അന്വേഷണം ആരംഭിച്ചു.