തിരുവനന്തപുരം; ഇന്ന് സംസ്ഥാനത്ത് ട്രെയിന്‍ സര്‍വീസുകള്‍ പുനഃരാരംഭിക്കാനിരിക്കെ, തിരുവനന്തപുരം – കണ്ണൂര്‍ ജനശതാബ്ദിയുടെ നാല് സ്റ്റോപ്പുകള്‍ സര്‍ക്കാര്‍ ഇടപെടല്‍ മൂലം വെട്ടിച്ചുരുക്കി. കണ്ണൂരിന് പകരം കോഴിക്കോട് സ്റ്റേഷനില്‍ നിന്നാവും തീവണ്ടി തിരുവനന്തപുരത്തേക്ക് പുറപ്പെടുക.തിരികെ തിരുവനന്തപുരത്ത് നിന്നും ഉച്ചയോടെ പുറപ്പെടുന്ന ട്രെയിന്‍ കോഴിക്കോട് സ്റ്റേഷനില്‍ സര്വ്വീസ് അവസാനിപ്പിക്കും.കണ്ണൂര്‍ കൂടാതെ ജനശതാബ്ദിയുടെ തലശ്ശേരി, വടകര, മാവേലിക്കര, കായംകുളം സ്റ്റോപ്പുകളും കേരള സർക്കാറിന്റെ നിര്‍ദേശത്തെ തുടര്‍ന്ന് റെയില്‍വേ റദ്ദാക്കിയിട്ടുണ്ട്.കണ്ണൂര്‍ ജില്ലയിലെ ഉയര്‍ന്ന പോസിറ്റീവ് കേസുകളും എല്ലാ സ്റ്റേഷനുകളിലും സ്ക്രീനിങ് സംവിധാനം വ്യാപിപ്പിക്കാനുമുള്ള അസൗകര്യം മൂലമാണ് സര്‍വീസുകള്‍ വെട്ടിച്ചുരുക്കിയതെന്നാണ് സൂചന.ചൊവ്വ, ശനി ഒഴികെ ആഴ്ചയില്‍ മറ്റു അഞ്ച് ദിവസവും ജനശതാബ്ദി സര്വ്വീസ് നടത്തും.അതേസമയം ഇന്ന് മുതല്‍ കൂടുതല്‍ യാത്രാ ട്രെയിന്‍ സര്‍വീസുകള്‍ തുടങ്ങുന്നതിന്റെ ഭാഗമായി കേരളത്തില്‍ ആറ് ട്രെയിനുകള്‍ ഓടി തുടങ്ങും. മുംബൈയിലേക്കുള്ള നേത്രാവതി, തിരുവനന്തപുരം കോഴിക്കോട് ജനശതാബ്ദി, തിരുവന്തപുരം കണ്ണൂര്‍ (കോഴിക്കോട് വരെ) ജനശതാബ്ദി, മംഗളാ എക്സ്പ്രസ് , നിസാമുദ്ദീന്‍-എറണാകുളം തുരന്തോ, തിരുവനന്തപുരം -എറണാകുളം പ്രത്യേക ട്രെയിന്‍ എന്നിവയാണ് കേരളത്തില്‍ സര്‍വീസ് നടത്തുന്നത്.യാത്രക്കാര്‍ ഒന്നര മണിക്കൂര്‍ മുന്പ് റെയില്‍വേ സ്റ്റേഷനില്‍ എത്തണം. ജനറല്‍ കംപാര്‍ട്ട്മെന്‍റില്‍ യാത്ര അനുവദിക്കില്ല. എസി, സ്ലീപ്പര്‍ കോച്ചുകളില്‍ മുഴുവന്‍ സീറ്റിലും യാത്രക്കാരെ അനുവദിക്കുമെന്നതിനാല്‍ സാമൂഹിക അകലം പാലിക്കുന്നത് വെല്ലുവിളിയാണ്. ട്രെയിനില്‍ പാന്‍ട്രികള്‍ പ്രവര്‍ത്തിക്കില്ലാത്തതിനാല്‍ ഭക്ഷണവും വെള്ളവും യാത്രക്കാര്‍ കരുതണം.ടിക്കറ്റുകള്‍ ഓണ്‍ലൈനായും തെരഞ്ഞെടുത്ത കൗണ്ടറുകള്‍ വഴിയും ബുക്ക്‌ ചെയ്യാം.